CONDOLENCE sa mga nangamatay. Apan hangtod karon, naa pa gyuy wala makat-on nga mopatuo sa Philippine Coast Guard nga niresulta sa pagkalunod sa tulo ka bangka didto sa Iloilo-Guimaras channel diin lakip sa nangamatay kay pito ka Sugboanon.
Niabot og 25 ka tawo ang nangamatay samtang unom ang wala pa makit-i.
Gikinahanglang imbestigahon ang maong insidente ug matino kon si kinsa ang paninglan ug silotan.
WTE
Makadasig alang sa Sugbo kining balita gikan kang Gob. Gwendolyn Garcia nga usa ka Chinese company ang interesado motukod og usa ka waste-to-energy (WTE) facility aron makatabang sa Kapitolyo sa pagsulbad sa kon asa ilabay ang basura.
Ang WTE nagpasabot sa usa ka pabrika nga modawat og basura dayon iyang sunogon ug sa ngadto-ngadto mahimong elektrisidad. Nindot kini kay gawas nga mahipos ang basura, madugang pa sa atong supply sa kuryente.
Nakakita na ko uban sa pipila ka sakop sa media sa Sugbo dihang nangadto sa Taipei mga usa ka dekada na ang milabay niining WTE facility.
Limpiyo ang palibot sa maong planta gawas sa Taipei didto sa Taiwan bisan og daghang mga trak sa basura ang nanghuwad sa basura sa syudad. Nakita namo ang usa ka playground sa ubos samtang dunay nag-biking sa bike lane ug nag-canoe sa sapa sa duol.
Dayon, diha mi sa revolving restaurant sa ibabaw sa panghaw sa maong WTE facility naniudto.
Ang unang WTE facility dinhi sa Sugbo mao kining naa sa Lagtang, Syudad sa Naga human gisirad-an ug gi-rehabilitate ni Mayor Valdemar Chiong kaniadtong 2009 ang ilang dumpsite sa Bairan. Ang WTE facility sa Naga nag-supply og pangsugnod sa planta sa Cemex.
Sa pagkakaron, gitakda nang mahuman ang dakong MRF kun material recovery facility diha sa Binaliw ug masundan kini sa usa ka dakong WTE facility.
Gwen
Matod ni Gob. Garcia, nahisgutan kini dihang nakigtigum siya kang Consul General sa People’s Republic of China Jia Li sa miaging Hulyo 5, 2019.
Ang usa ka WTE nga planta mahimong matukod sa build-transfer-operate scheme, unsolicited proposal, o bidding.
Matod ni Li, ang New Sky nga usa ka Chinese company nga naan a karon sa Sugbo na-involved sab sa garbage disposal. Ang maong kompanya nahuman sa pasiunang research alang sa maong planta ug nagplanong mo-invest og $100 milyones alang sa pasiunang mga ang-ang sa proyekto, matod ni Gob. Garcia sa miaging Agusto 2.
Kining WTE nahisgutan na ni Gob. Garcia sa wala pa siya makadaog sa miaging piliay kay mas maayo man kini kay sa usa ka landfill.
@anol_cebu sa Twitter