ILLEGAL parking. Sa miaging semana ang Land Transportation Office (LTO) 7 dinhi sa Sugbo nagpahibawo nga ilang panakpon ang mga sakyanan nga moparking sa kadalanan labina sa highway agi ug pagsunod sa gi-orden ni Presidente Duterte atol sa iyang State of the Nation Address (Sona) nga bawion na ang mga kadalanan nga gihimo nga tindahan ug parkingan.
Si LTO-7 Regional Director Victor Caindec sa miagi nagpahayag sa prensa nga ilang ipatuman ang gilagda ni Duterte nga malimpyohan ang dalan ug sidewalk sa mga naninda ug sa sakyanan nga nagparking gikan sa habagatan hangtud ngadto sa amihanan.
Kahibawo ta nga kuwang og tawo ang LTO. Gani, sa miagi nga operasyon sa LTO dihang nanakop sila og mga kolurum nga sakyanan sa Talisay City nagpatabang si Caindec sa pulis ug sundalo. Mao ni nakaapan sa atong kagamhanan. Naay ahensya nga dunay katungod sa pagpanakop sama sa LTO apan kuwang sa tawo.
Si Director Caindic nakahibawo asa dapit dinhi sa Sugbo ang mga siyudad ug lungsod nga ang mga highway gihimo nga parkingan sa mga awto. Maayo unta og masugdan na dayon ni Caindec ang pagpatuman sa orden sa Presidente.
Dili ni pagtumbok sa lungsod sa Consolacion, Liloan ug Compostela apan sa mga motorista nga magsige og biyahe ngadto sa amihanan nakahibawo kon unsa kagrabe ang trapiko ning mga lungsora. Dinhing dapita wa nay giingon nga “peak hour” kay matag adlaw grabe ang trapiko.
Usa sa mga hinungdan nga grabe ang trapik sa mga nahisgutan, mao ang illegal parking sa highway. Lain nga hinungdan kay ang mga dagko nga tindahan nag-atubang sa highway.
Si DILG Secretary Eduardo Año nagpagawas na og memorandum circular ngadto sa iyang mga director ug sa tanan nga mayor nga ipatuman ang gimando ni Duterte nga ibalik ang mga kadalanan nga agianan sa mga sakyanan ug sa mga tawo.
Maingon nato nga kining maong orden naghatag og dugang labad sa ulo sa mga mayor apan wala silay mahimo kay ang usa sa mga bulohaton sa mayor mao man ang pagpatuman sa balaod. Si Duterte dugay na nga mayor sa dakbayan sa Davao mao nga suhito siya sa mga problema sa usa ka dakbayan.
Ang lain nga palambuon sa mga mayor mao ang pag-ensayo og maayo sa ilang mga traffic enforcer labina sa pagpanakop ingon man sa pagderihir sa trapiko. Kagahapon sa sayo sa gabii dunay bangga sa motorsiklo ug pick-up sa highway sa Consolacion atubangan sa usa ka dako nga tindahan.
Ang mga traffic enforcer nga nag-imbestigar sa bangga wa jud modirihir sa trapiko aron sa pag-iway sa mga sakyanan nga molikay sa dapit diin naay bangga, kay ang mga drayber nga nagpadung sa Mandaue wa makahibawo nganong nag-urong ang trapiko sa dapit.