2 milyones ang danyos sa sunog

DUHA ka milyon ka pesos ang kinatibuk-ang danyos sa sunog nga nilamoy sa panimalay ni Davao del Sur Electric Cooperative (Dasureco) Board of Director (BOD) Wilfredo Granada.

Sumala sa Bureau of Fire Protection (BFP), napasagdang kandila ang hinungdan sa pag-ulbo sa dakong kalayo mao nga way bisan usa nga nasalbar ang pamilya Granada.

Kahinumdumang namatay ang inahan niini nga si Marcela Granada sanglit naghigda na kini sa iyang lawak diin nanukad ang pagkanit sa kalayo.

Si Granada, kinsa mao sab ang vice president sa Dasureco mao ang pinakaunang biktima sa sunog sukad gi-implementar ang brown-out.

Matod sa mga nakasaksi nga pasado alas 9:00 nagsugod ang kalayo apan daw nalangay ang pag-abot sa mga bombero mao nga wa na gyud niini makontrolar ang sunog.

Gibarogan sa BFP nga nalangay ang pag-responde sanglit dugay nadawat ang impormasyon.

Nahitabo ang sunog samtang gipatuman sa Dasureco ang tag-lima ka oras nga rotating brown-out sa lalawigan subay sa gipangayong power curtailment time sa National Grid Corporation of the Philippines.

Didto sa siyudad sa Digos, gitataw ni City Fire Marshall Desimoso Remorosa nga duha na ka insidente sa sunog ang natala sa ilang buhatan sukad gipatuman ang power deloading niadtong Pebrero 23.

Apan way namatay o nasamdan sa nahitabo, ni Remorosa.

Matag buwan sa Marso, saulogon sa BFP ang 'Fire Prevention Month' subay sa Presidential Proclamation nga gilagdaan niadtong Nobyembre 17, 1967 ni kanhi Presidente Ferdinand Marcos.

Ang pagsaulog karong tuiga, giubanan sa temang "Sustaining Fire Prevention through Active Community Participation."

Hugot nga gi-awhag sa BFP ang katawhan nga mag-amping gyud sa ilang paggamit og kandila ug lampara panahon sa brown-out sanglit dinhi manukad ang sunog.

Apan dako ang katingala sa katawhan kun nganong masinati gihapon ang taas nga oras sa brown-out human nga nag-operate na pagbalik ang Iligan Diesel Power Plant niadtong Lunes.

Sayo niini, nisaad sab ang upat ka mga dagkong kumpanya sa lalawigan nga motabang sila sa pagdaginot og kuryente pinaagi sa paggamit og generator sud sa 9 ka oras aron makatigom og 7 megawatts ang Dasureco.

Gumikan niini, giingong makunhuran na ang oras sa brown-out dinhi sa lalawigan sanglit alang sa katawhan, dako ang pagka-balda sa ilang trabaho panahon nga mawala ang kuryente og 5 ka oras matag adlaw. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph