ALANG sa mga Sugboanon makatagamtam kita og upat ka holidays karong buwana. Lima gyud gani ka holidays kon atong apilon ang Mandaue City. Karong adlawa, holiday sa tibuok lalawigan sa Sugbo gumikan kay atong gisa-ulog ang ika-450 ka anibersaryo sa pagka-kaplag sa lalawigan sa Sugbo. Karong petsa 30, holiday usab sa Mandaue kay ika-50 ka tuig nilang Charter Day.
Karong Agusto 12, Lunes holiday usab kay i-obserbar sa atong nga igsoong Muslim ang Eid adha o feast of sacrifice. Unya sa Agusto 21, holiday usab kay death anniversary ni kanhi senador Ninoy Aquino. Ug pagka-Agusto 26, Lunes, holiday na pod kay National Heroes Day.
Ang Bureau of Working Condition nagpakita nga ang nasud adunay mas daghang holidays, working ug non-working kay sa ubang walo ka mga nasud sa Asia. Ang China ang mas daghag og holidays sa mga nasud sa Asia. Ang mga local holidays sa nasud moabot ngadto sa 184. Apil na niini ang mga request sa mga local government units (LGU) ngadto sa Malakanyang nga i-deklarar nga holiday sa ilang mga lugar gumikan sa espisyal nga kasaulogan sama sa Charter Day o founding anniversary.
Alang sa mga trabahante medyo aduna kini kaayuhan nga makagahin sila og igong panahon sa ilang pamilya. O ba kaha makagahin og mga igong panahon sa ilang pagsuroy-suroy. Samtang nangalipay ang ubang mga trabahante, naguol usab ang kadaghanan labi pa gyud ang mga “no work, no pay” kay wala man silay madawat kay wala may trabaho.
Sa habig sa mga employers usab, dili kini angayan nga ikalipay kay maapektuhan ang productivity sa kompaniya og dako ug makabayad ang mga negosyante sa premiums sa ilang mga empleyado. Ang posibilidad nga adto kini ihapak sa presyo sa ilang mga produkto. Gawas aning mga regular holidays nga naa gyud sa balaod, angayan siguro usa nga limitahan kining pagdeklarar og mga special working holidays para sa kaayuhan sa uban. (bobbygnalzaro@gmail.com)