TAN-AWA ra ning taga Department of Public Works and Highways (DPWH) sa Central Visayas.
Nagpatuga-tuga og pasalig sa publiko nga maagian na niadtong Dominggo, Agosto 4, 2019 ang pikas habig sa Mananga Bridge sa Tabunok, Talisay City nga ilang giayo.
Pero niadtong Biyernes, Agosto 2, sa dihang gipa-check ni Talisay City Mayor Gerald Anthony Gullas Jr. sa iyang mga staff kon unsa na ang kalambuan sa maong taytayan, bisan unsa na lay girason sa mga engineers sa DPWH aron lang pag-justify nga dili diay nila matuman ang ilang gisaad.
Matod ni Gullas nga technical kaayo nga mipasabot ang mga engineers sa DPWH kon nganong madelatar na usab ang pagpagamit sa taytayan, butang nga nakapasagmuyo kaniya.
Pero sa dihang gipangutana ni Gullas ang kontraktor kon unsay hinungdan sa pagkalangan, dili man kuno kini motingog. Unsa kahay drama nga naglimin ning duha ka kampo nga grabi na man kaayo ang pagkalangan sa maong proyekto nga niadto pa diayng Nobiyembre gisugdan.
Gikabalak-an karon ni Gullas nga tungod niini mograbi ang kahuot sa dagan sa trapiko karong Dominggo, Agusto 11, sa maong dapit.
Kini tungod sa pagpahigayon sa 2019 Regent Aguila Ironman 70.3 Philippines kay siradoan man ang Cebu South Coastal Road sa Talisay nga nagsumpay sa South Road Properties sa dakbayan sa Sugbo. Kay lagi naapil man kini sa rota.
Si Joselito Sayson, ang hepe sa construction division sa DPWH-7, misaad (na sab?), nga ilang hunongon ang pagtrabaho niining adlawa aron temporaryo kining magamit niadtong mga gagmayng behikulo.
So, kon magamit lang kini alang sa mga gagmayng behikulo, asa na man nato paagi-on ang mga bus? Daghan ra bang mga pasaherong estudiyante niining adlawa.