NADAWAT na ni Davao del Sur Governor Douglas Cagas ang kopya sa kasong gipasang-at batok kaniya sa mga kaatbang didto sa buhatan sa Ombudsman.

Si Cagas ug iyang anak nga si 1st District Representative Marc Cagas, gipasakaan og kaso nila ni kanhi 2nd District Representative Claude Bautista, Lawyer Jerome Undalok ug Sta. Maria Mayor Rody Mariscal ug Gualberto Sioco, ABC President sa Jose Abad Santos ilawom sa partidong Nationalist People's Coalition (NPC).

Nanukad kini sa alegasyong "overpricing" sa pagpalit og yuta nga gitukoran sa multi-million project nga Davao del Sur Sports Complex nga nibalor og kapin P500 milyones.

Si Undalok namahayag nga bug-at ang rason nga ilang pagpasaka sanglit usa sila sa mga nagbayad og buhis. Ang gipasang-at nga kaso, usa ka taxpayers suit.

Matod pa nga 24 ka kaso ang giatubang karon sa gobernador ug gilangkuban kini sa double insertion, bribery ug uban pa.

Gibarugan ni Undalok nga lig-on ang mga ebidensya nga gikuptan nila batok sa mga Cagas.

Samtang si Sta. Maria Mayor Rody Mariscal nibuhi og susamang pahayag nga nakita nilang adunay buslot ang pagtukod sa sports complex hinungdan nga apil pagduso sa asunto.

Gidugang pa sa mga nagpaluyo sa kaso nga dili usa ka political harassment ang ilang gihimo sanglit wa gani nila kini gihisgutan sa ilang grupo.

Gani, mismong si Cagas matud pa ang unang nagpagawas og pahayag sa iyang istasyon nga Charm Radio nga siya gipasakaan og kaso.

Dason ni Undalok, dili angay hisgutan ang moral decedency sanglit bisan og mga tawong wa'y grado, mamahimo nga makapasaka og kaso kung ikaw kabahin sa nagbayad og buwis sa lalawigan.

Sayo niini, si Cagas nagkanayon nga wa siya'y gikahadlukan ug andam na sa pagtubag sa iyang kaso didto sa Ombudsman sanglit wala'y nahimong anomaliya sa transaksyon sa yuta nga iya sa iyang paryente nga mga Almendras.

Nagtuo si Cagas nga gibutang-butangan siya sa iyang mga kaaway sanglit wa sila'y makitang dautang lama sa iyang pagpanerbisyo nga nagahatag kanunay og daghang proyekto sa katawhan.

Hinuon, hagit karon sa iyang mga kaatbang nga tubagon ang tanang kaso didto sa buhatan sa Ombudsman ug dili sa iyang istasyon aron masuta kung kinsa kanila ang nagsulti sa tinuod. (Dondon Dinoy)