MALIPAYONG pagsaulog sa ika-71 Araw ng Kapalong 2019. Congratulations sa tanang opisyales sa maong munisipalidad ubos sa liderato ni Mayor Maria Theresa Royo Timbol kay nagmalampuson ang maong kasaulogan.
Usa ka semana gayod ang ilang pagsaulog nga may tema nga, “Sulong Kapalong! Kalinaw ug Kalambuan Atong Ipadayon” nga haom kaayo sa atong nakita sa palibot.
Kanunay akong magbalik-balik sa Kapalong kaniadto tungod kay ang akong igsuong babaye nagtrabaho sa Dole Philippines nga may plantasyon sa saging sa Luna.
Nahimong suod pud nako nga higala sila Mayor Tess ug Vice Mayor Ed Timbol ug ang iyang abtik nga side-kick nga si Ma’am Sandy Elizaga.
Aduna sab koy gi-evaluate kaniadto nga dakong “development project” alang sa mga lumad nga gisuportahan sa “Brot fur der Welt” sa Germany.
Nahimong dinapit nga mamumulong sa Department of the Interior and Local Government (DILG) regional director Alex Roldan sa katapusang adlaw sa ilang kasaulogan.
Iyang gidayeg ang lokal nga kagamhanan sa ilang kakugi sa pagtubag sa mga panginahanglan sa katawhan mao nga nilambo sa pipila ka pilo ang munisipalidad.
Mao nga iyang gibutyag ang plano sa DILG nga mohatag og gatusan ka mga ambulansya sa rehiyon. Ang probinsya sa Davao del Norte posibleng modawat og 50 ka buok og apil niini ang lima ka ambulansya ihatag sa Kapalong diin nahimutang ang usa ka dakong hospital.
Andam na ang badyet alang niini apan dunay ginaayos pa tungod kay gusto nila, kauban si kongresista Bebot Alvarez nga “compliant” o nahisubay kini sa lagda sa Department of Health.
Mga ambulansya kini nga maayo ang kalidad, 4-wheel drive nga pwede mosaka ug mosulod sa hilit og lapukon nga dapit nga dili moligid, kumpleto sa kahimanan sa pag-atiman sa masakiton sama sa tambal, gamay’ng “operating table,” “oxygen tank” ug “x-ray.”
Matud pa niya nga wala pay “DOH-compliant” nga ambulansya sa rehiyon, bisan gani ang atong garbo nga 911 action center sa Davao City. Mao seguro kining mga ambulansya nga makita nato sa TV sa langyaw’ng nasud nga nag-rescue og pasyente nga morag gamay nga hospital.
Haum daw kini sa sitwasyon sa Kapalong ug daghang dapit sa rehiyon diin halayo ang mga “medical facilities.” Atong pasalamatan ug daygon ang maong plano sa DILG ug sa ubang lokal ug nasudnong ahensya sa gobyerno nga tinud-anay nga naglantaw sa kahimtang sa uyamot nga katawhan.
Gawas sa problema sa panglawas, hinay-hinay niining gitubag ang gamut-hinungdan sa kapobrehon sa tawo nga maoy mitsa sa armadong pakigbisog sa kabanikanhan.
Ato lang i-ampo nga magpadayon ang mga susamang programa sa gobyerno ug motuhop kini sa katawhang labing nanginahanglan. O, prutas pa more!