GITAMBAGAN sa City Disaster and Risk Reduction Management Office (CDDRMO) ang mga molupyo duol sa baybayon nga naapektuhan sa habagat nga di na mobalik sa ilang mga lugar.
Sumala sa City Social Services and Development Office (CSSDO), ang lokal nga kagamhanan nitabang sa 522 pamilya kon diin mga pinuy-anan apektado sa dagkong mga balud daplin sa baybayon niadtong tapos sa semana (weekend).
Si CDDRMO chief Alfredo Baloran nagbutyag nga mga naapektuhan nga mga barangay niabot na og siyam nga mao ang 21-C, 22-C, 23-C, Matina Aplaya, Gov. Duterte, Lapu-lapu, Bago Aplaya, Bucana (76-A) ug Daliao.
Gikanayon ni Baloran nga ang siyudad makasinati og habagat sud sa duha ka bulan tungod sa tropical depression.
Samtang siya nagkanayon nga ang CDDRMO nagrekomendar niining mga lugara nga "hazard areas" nga ilang giawhag nga di papuy-an sa mga naapektuhang pamilya.
"Gina-encourage namo sila nga di na sila mobalik sa area, kay ma-disturb man gihapon ilang pamuyo," tin-aw ni Baloran human sa flag raising ceremony niadtong Lunes, Agosto 5, sa City Hall sa siyudad sa Davao.
"Kung kami lang sa CDDRMO, bawal jud na siya. CDDRMO has recommend na malimpyo ug mahawa sila kay endanger man ilang life all the time," dugang ni Baloran.
Iya sab nga gipanawagan ang tanang mga kapitan sa barangay sa maong mga lugar nga did-an ang maong mga pamilya nga mobalik sa lugar.
Giklaro ni Baloran nga sa milabay nga panahon, ang CDDRMO nilusad og information dissemination bahin sa preemptive and evacuation measures sa dihang ang mga dagkong mga balud niigo sa kabaybayonan.
"Hinuon, wala man ta nalisdan kay advance info dissemination naman ato gihimo. Naa lang uban nagmagahi kay ang katarungan nila is that anad na sila sa ana nga sitwasyon. Pero wala nila na-anticipate unsa kadako sa balud na ang ilang sagubangon," pagklaro niya.
Sumala pa sa opisyal nga ang gi-instolar nga coastal cameras nakatabang sa CDDRMO ug ilang auxiliary units nga dali rang makaresponde sa maong insidente.
Hinuon, nakatala sila og pipila ka mga gagmay nga mga angol sa dihang mibayo ang mga dagkong balud sa mga kabalayan.
Niadtong Dominggo, ang lokal nga kagamhanan, pangulohan ni Bise Mayor Sebastian "Baste" Duterte, nanguna sa pagsusi sa tanang evacuation centers ug sa pag-apud-apod og hinabang.
Si CSSDO head Maria Luisa Bermudo nagsulti nga ang siyudad naggahin og P5,000 nga tabang matag pamilya.
Tug-an sab niini nga padayon pa silang nag-surbey sa mga naapektuhan nga pamilya alang sa dugang tabang.
Sa pikas bahin, iya sab nga gidasig ang barangay council, ilabi sa ilang disaster risk reduction and management council, nga manguna sa pagpugong nga ang maong mga pamilya di na makabalik sa ilang mga lugar tungod sa kapeligro niini.