MALAUMON si Misamis Oriental Governor Bambi Emano nga unta mahimong ehemplo sa katawhan sa lalawigan sa Misamis Oriental kining mga Barangay Nutrition Scholar nga makabaton og kaugalingon nga backyard farm aron masunod sa katawhan sa lalawigan.
Atol sa culminating activity sa ika-45 ka tuig nga pagsaulog sa Nutrition Month sa bulan sa Hulyo nga gipahigayon sa hawanan sa kapitolyo, niadtong Hulyo 31, 2019 gidasig ni Emano ang tanan nga mga BNS nga kung adunay bakanteng luna sa ilang mga puloy-anan mahimo kini nilang tamnan ug mga utanon butang nga dili na mogasto, dili na paliton ang mga gulay nga presko pa nga makaon sa tibouk pamilya.
"We want to encourage them nga sila unta atong mga BNS naa pud unta silay kaugalingong farm sa ilang kaugalingong balay. Mao unta na atong I kampanya ba. How can a barangay nutrition scholar be a BNS if she, herself or himself, wala siya'y kaugalingong uma,” matud ni Emano.
Dugang ni Emano nga ang programa sa agrikultura dili lang angayan isalig sa munisipyo o sa probinsya tungod kay kung magsugod sa kaugalingon mas taas ang maabtan nga dili na kinahanglan magsalig sa uban. Bukas ang buhatan sa probinsya sa pag-apod apod og mga seedlings alang sa katawhan.
"I made it very clear that the implementation of the agriculture programs dili lang isandig didto sa atong mga gitawag nga mga Municipal Agriculturists office or City Agriculturists. Now, I would like to request our doctors and mayors nga ang inyong mga BNS pwedi na sila didto mag withdraw ug seedlings sa mga lagotmon ug utanon dinhi sa kapitolyo probinsyal," sigon ni Emano.
Ang tema sa kasaulogan “Kaon sa insakto aron mahimong maabtikon...Buhaton nato ni!" ang gitambongan 700 ka mga delegado nga gilangkoban sa Barangay Nutrition Scholars (BNS) ug Municipal Nutrition Action Officers (MNAO), gikan sa 23 ka lungsod ug duha ka dakbayan sa Misamis Oriental.
Gipangunahan sa Provincial Nutrition Division ug Provincial Health Office ang maong kasaulogan.
Hurot hurot sab ang mga baligya sa Nutri-Agri Booth Display kon asa ang abot ug mga gama sa Misamisnon gidala sa hawanan sa kapitolyo ug gidisplay kon asa napasundayag ang preskong prutas, utanon, isad, mga utanon nga anaa na nakasulod sa basket, basket alang sa halang halang nga manok ug uban pa.