SUPERBALITA CAGAYAN DE ORO

Todiño: Upos

Pro Bono

TIMAN-I diha kini sa dalan Capistrano ug sulod lang sa usa ka oras. Natigum sa mga sakop sa City Local Environment and Natural Resources Office ang kapin sa 10 mil ka mga upos sa sigarilyo. Makalilisang!

Unsa may buot ipasabot niini? Kon lukpon nato pagsuhid ang dakbayan tingali makapunit ta og minilyon ka mga upos sa sigarilyo.

Hangtud kanus-a masulbad kining problema sa pagpataka og labay sa basura?

Dunay sulosiyon niini apan kana magdependi ra gyud sa City Hall ug kooperasiyon sa katawhan. Kon nahimo sa ubang dakbayan way katarungan nga dili maimplementar nato kining pagdili og panigarilyo sa publikong mga dapit.

Gawas nga makadaot kini sa kinaiyahan kay lagi dugay madugta kining upos sa sigarilyo, grabe sab og epekto niini sa panglawas.

Gisugdan sa Clenro ang kampaniya sa pagpanghipos og basura matag Biyernes. Maayo kini nga programa. Apan, dili gyud kana garantiya nga malimpiyo atong palibot.

Kon tiunay nagpakabana ang gobiyerno, nan, sugdan nato ang kampaniya diha mismo sa tugkaran sa City Hall ug sa ubang opisina sa gobiyerno. Idili gyud sa hingpit kining pagpanigarilyo.

Pipila lamang kining mga tawo nga manigarilyo. Kinahanglan moprektahan nato ang kadaghanan. Di ba?

Dili gyud masabtan kon nganong dili masumpo sa gobiyerno kining magpataka og labay sa upos sa sigarilyo. Lisod ba gyud kaayo sulbaron? Pastilan?

Kon maglisod ang gobiyerno pagsulbad aning problemaha basin makatuo ta nga mas badlongon pa sila sa tawo nga nagpataka og labay og upos sa sigarilyo.

Kining tawo man gud nga manigarilyo mao na ang matang sa binuhat nga way respeto, hugawan, way kabalaka sa ilang panglawas ug masinupakon sa balaod. Ingna ko og dili tinuod!

Duna bay respeto kanang magpataka og pabuhot sa aso atubangan sa daghang mga tawo? Dili ba hugawan kanang magpataka og labay sa upos? Bisan nakahibalo na sa dautang epekto sa panglawas apan nagpadayon gihapon og panigarilyo. Dunay mga pahibawo nga ‘no smoking’ apan wa panumbalinga ang pahimangno.

Usbon nato paghagit ang gobiyerno nga ‘please’ lang asikaso na intawon ning pagpataka og labay og mga basura sa palibot. Tinuod gamay ra na ang upos, apan kon imong sud-ongon ang hulagay nga kuha sa Clenro human sa ilang cleanup drive, maka-ingon ka ‘daghan man diay.’

Kanang ‘daghan’ kon dili na mahipos, sud sa dugayng katuigan segurado nga mas modaghan pa. Mas modaghan ang basura ug mas modaghan sab ang badlongon nga mga tawo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph