DAKO ang posibilidad nga ipatuman na usab ang "signal jamming" sa mga dagkong kalihokan sa dakbayan sa Cagayan de Oro subay sa kapistahan.
Kini kabahin sa hugot nga ipatumang seguridad sa kapulisan.
Gibutyag ni Mayor Oscar Moreno nga mag-agad lamang kini sa kapulisan ug mga nagpatuman sa seguridad sa dakbayan apan ipatuman niini kung kinahanglan tungod kay lisod na usab kung simbako malutsan sa mga dautang elemento.
"Mag-agad lang ko sa atong mga security people if they recommend nga kinahanglan gyud of course we will of course, we cannot take chances, nakasabot ko nga naay mga inconveniences labi na kadtong parada," matud ni Moreno.
Gidugang pa niini nga angayang manigurado gyud ug i-implementar kung gikinahanglan.
Samtang nibutyag usab si PLt.Col Henry Dampal, City Director sa Cagayan de Oro Police (Cocpo) nga kini ubos sa konsiderasyon sa kapulisan.
"Ato gihapon ng gi-consider no, naa naman gani ta'y request pud nga gipadala nga hopefully ma-approved kay nakita man nato nga effective sa mga previous nga fiesta celebration," matud ni Dampal.
Gidugang pa nga kung ma-aprobahan ipatuman gyud gihapon kini sa kapulisan aron masiguro nga dili masabotahe ang kahusay ug kalinaw sa dakbayan ilabi na sa mga dagkong kalihokan sa kapistahan.