DUWA karon
4:00 pm- USJ-R batok SHS-AdC (High school)
Gipakita sa Southwestern University (SWU)-Phinma Cobras nga andam na silang maghari og balik sa collegiate basketball sa Sugbo pinaagi sa paglangkat sa korona sa Cebu Schools Athletic Foundation Inc. (CESAFI) 2019 Partner’s Cup niadtong Dominggo sa gabii sa Cebu Coliseum.
Giusban pagpukan sa Cobras ang defending champion ARQ Builders/University of the Visayas (UV) Green Lancers, 74-65, sa Game 2 aron humanon og sayo ang ilang best-of-three championship series, 2-0.
Niini, makonsiderar ang Cobras nga usa sa labing lig-ong kandidato nga makailog sa korona sa Green Lancers sa CESAFI regular season nga mosugod karong Agusto 31.
Apan alang kang Cobras coach Mike Reyes, daghan pa silang angayan nga trabahuon aron makalangkat pagbalik og titulo sa CESAFI.
Gipasabot ni Reyes nga ang ilang pagkahimong kampiyon sa Partner’s Cup dili mahimong basihan sa ilang kampanya sa umaabot nga 2019 season sa CESAFI.
“We have shown all our cards, the preseason lineup will be our team in the regular season. We are going to prepare hard, we know that the other teams are still working on the lineup,” matod ni Reyes.
Hinuon tataw sa mga mata ni Reyes ang kalipay nga iyang gibati gumikan sa maayong gipakitang duwa sa iyang mga batos sa Partner’s Cup hilabi na sa ilang import nga si Lamine Thiam, kinsa maoy napiling pre-season MVP.
“Hulog sa langit yan. I can’t say anything to him. He does what the team needs. He played great defense. He showed all-around brilliance, when we need the scoring he scored and when he’s teammates were scoring he got the rebounds,” matod ni Reyes kinsa kabahin kang Thiam.
Si Thiam niabot sa SWU niadto lang bulan sa Hunyo human kini girekomendar sa usa ka kaila ra usab ni Reyes nga recruiter didto sa Kaulohan.
“Actually, tumawag sa akin yung kaibigan ni coach Yayoy (Alcoseba) sa Manila na parang recruiter din, at saka ni-re-recommend niya sa amin. Kaya sinubokan namin, ayon...magaling at saka mabait,” dugang paghulagway ni Reyes sa iyang import.
Gipangulohan ni Thiam ang kalampusan sa Cobras pinaagi sa iyang 23 puntos, nidugang og 12 puntos si Red Cachuela, nitampo og 11 puntos si Shaquille Imperial samtang niamot og 10 puntos si William Polican.
Ang Green Lancers gipangulohan nila ni Gileant Delator ug Lass Coulibally pinaagi sa ilang 14 puntos matag usa.
Sa laing bahin, magtiwas karong alas 4:00 sa hapon ang Cebu Landmasters/Sacred Heart School-Ateneo de Cebu (SHS-AdC) Magis Eagles ug University of San Jose-Recoletos (USJ-R) Baby Jaguars sa deciding Game 3 alang sa high school division finals series.
Ang Magis Eagles ningpukan sa Jaguars, 71-67, sa kulbahinam nga Game 2 aron pagpugos og deciding game. (ESL)