OPPSSS...
Daghang nasurprisa ning kalit nga kausaban sa pagpili og chairman sa Cebu City Sports Commission (CCSC) nga nakapatingkag usab sa pipila ka mga dawunggan sa atong mga local sports leaders.
Sukwahi sa nabaniog nga ang inilang sportsman/businessman nga si Lorenzo “Chao” Sy, maoy gitudlo ni Cebu City Mayor Edgar Labella nga maoy mangulo sa sports commission, sa kalit lang, nahulipan kini ni Edward Hayco kinsa modagan na ngadto sa napulo ka tuig nga paghupot sa maong puwesto.
Sa laktod nga pagkasulti, magpabilin gihapon siya sa posisyon nga iyang nasugdan pagkupot niadtong panahon pa ni Cebu City Mayor Osmeña.
Wa man tuoy nahimo si Chao, apan dili nato masalindot ang dakong niyang kasagmuyo nga gibati nga mora og naigo sa tamparos, kay tiaw mo bay misugod na siya sa paglingkod sa puwesto ubos sa instruction ni Mayor Labella pipila lang ka adlaw.
Apan unsa bang pagka unsaa, nga mao lay iyang nahibaw-an nga si Hayco diay gihapon ang chairman human kini nakapakita og appointment gikan sa mayor.
Si Sy, matod niya, sa sinugdanan wala siya moporsigir dayon sa paglingkod sa chairmanship tungod kay naghuwat siya sa iyang appointment, apan sa dihang iyang gikaatubang si Mayor Labella, siya gimandoan sa mayor sa pagsugod na sa iyang trabaho kay isunod ra ang appointment.
Sa way daghang kutikuti mituman si Sy sa mando ni Labella. Ug tuod man nisunod gyud ang appointment pero dili diay para niya, kon dili alang ni Hayco.
“Ambot wa ko kahibawo ngano ni, sakit kaayo sa akong buot. Nakamiting na gud ko sa mga komisyoner. Unya karon dili diay ako chairman. Nauwaw ko ani kay nabalita na gud ni,” matod ni Sy kinsa lunod-patay nga tigsuporta ni Labella ug vice-mayor Mike Rama kaniadto pa.
Gikahibulong kaayo niya ang nahitabo, ug gawas niini, gibati usab niya ang dakong kahiubos. Aron paghuwap-huwap sa ka sakit nga gibati, gitudlo siya nga vice-chairman.
Ang kausaban, nakapasagmuyo usab sa mga sakop sa committee on sports sa konseho ug sa pipila ka mga commissioners nga gipili na unta ni Chao Sy nga makig-abag kaniya.
Dugang ni Sy nga wa siya magdahom nga mahitabo ni kay mismo si Hayco nag-text ug ni-congratulate na kaniya. Gani mitanyag pa kini nga mosuporta sa iyang mga kalihukan.
Matod ni Sy nga nahan-ay na unta niya ang iyang nga programa nga iyang gitawag og “All-Sports,” programa nga dili lang magsentro og usa ka event.
Pero nagtuo siya nga sa paghibalik ni Hayco sa puwesto mausab na kining tanan.
Sa niaging Biyernes, adunay gipahigayong meeting ang Sports Commission, ug ning higayona, si Hayco na ang nag-preside.
Dili ta ka confirmed kon unsay nahitabo, pero sigon sa atong kasayuran nga nahagdaw, nga wa matiwas ang meeting ug sayo kini nga na-adjourned kay wa kuno ikasinabot ni Hayco ang pipila ka mga sports leaders nga atoa misempatiya ni Chao Sy.
So, sabtunon nga adunay dili maayong kasikas nga mitumaw karon sulod sa sports commission, butang nga posibling makaapekta sa atong sports program ilabi na og dili gilayon mahapsay. Kini maoy atong sundon karon. (jun.migallen22@yahoo.com)