MOSUWAY paglikay sa kaw-it sa panamilit ang Sugbuanong si Allan Albindo sa iyang ikaduhang tahas sa Rich Franklin’s ONE Warrior Series (OWS) karong gabii sa Singapore.
Ning maong tahas, ang 22 anyos nga produkto sa Yaw-Yan Ardigma Cebu makigbatok kang Malaysian Arif Izzudin.
Sa interbyu sa Sun.Star Cebu, nagkanayon si Albindo nga nasayod siya kon unsa ka importante kining maong away alang kaniya ug dili niya kini usikan nga kahigayunan.
Si Albindo unang miaway sa OWS niadtong Hunyo 20 diin napilde siya pinaagi sa unanimous decision batok kang Indian Manthan Rane.
Gipasabot ni Albindo nga daghan siyang nakat-unan nga leksyon sa iyang kapildihan batok kang Rane ug determinado siyang makabawi ning higayuna.
Human sa iyang kapildihan batok kang Rane, matod ni Albindo nga nag-training dayon siya’g sugod alang ning ikaduha niyang tahas sa promosyon nga magdalit og kontrata sa ONE Championship nga nagbalor og $100,000.
Si Yaw-Yan Ardigma Cebu head Master Benigno ‘Ekin’ Caniga Jr. nagkanayon nga dako ang iyang pagsalig nga molampos na si Albindo. (EKA, ESL)