MIATENDER si Davao City Mayor Sara Duterte-Carpio sa kasaulogan sa ika-450th Founding Anniversary sa lalawigan sa Sugbo isip pinasidunggan nga bisita ni Gov. Gwen Garcia.
Nindot ang mensahe ni Mayor Sara.
Deretso nga pasalamat sa suporta sa mga Sugboanon ngadto sa mga senador nga gi-endorso sa iyang amahan nga si PRRD sa nakalabay nga piniliay.
Wala nay daghan pang pakapin o mga pasakalye.
Og labaw sa tanan, mubo lang ang iyang mensahe.
Mao kini angay hinumdoman sa mga politiko.
Kon mo-diskurso gani, angay nga mubo lang og deretso sa mensahi nga gusto niya ipaabot. Dili magdaghan og pasakalye.
Mas maayo nga magbinisaya aron dali masabtan sa naminaw og dili paspason sa pagsulti. Pero dili sab palabihan og kahinay kay dukaon man sab ug dili na maminaw ang mga tawo.
Kon nahuman na og paila-ila ang mga inila nga mga bisita, dili na angay balik-balikon pa paghisgot ang ilang mga pangalan sa mga modiskurso.
Puol paminawon kon magsigi og hisgot sa mga pangalan sa mga bisita. Labi na kon dayan-dayanan pa kini og mga char-char.
Kon modiskurso gani, angay nga maghuna-huna daan kon unsay mensahi nga gusto niya ipaabot sa mga naminaw.
Sa mga naminaw, mailhan dayon ang kulang sa pagpangandam – magbalik-balik ang isulti og napuno lang sa mga pangalan sa mga bisita ang ilitok.
Lahi kon ang diskurso may pakapin nga pangampanya.
Kon mao kini ang katuyoan, angay lang nga dili kalimtan sa modiskurso ang mga pangalan sa mga importanteng bisita.
Kon moadto og barangay o lungsod ba kaha, angay lang nga hatagan og pagtagad ang mga opisyales sa maong lugar. Hisgotan gyod kini kay mao ra kini ang higayon nga bation sa mga naminaw ang ilang kasuod sa nagdiskurso.
Apan angay ampingan kini. Kon maghisgot man gani sa pangalan, angayan lang nga husto nga pangalan ang ilitok, dili kay masayop sa apilyido ug sa paglitok niini.
Katungod sa hingtungdan nga masuko kon masayop paglitok ang iyang pangalan.
Kon mahitabo kini, dili na kini mabakwi pa bisan magbalik-balik pa og pangayo og pasaylo ang nagdiskurso.
Mas nindot pa gani nga atol sa paglitok sa pangalan, tan-awon sab sa nagdiskurso ang tawo nga iyang gipasabot. Nindot ang epekto niini kay nagpasabot lang kini nga nakaila personal ang nagdiskurso sa tawo nga iyang gipasabot og wala lang siya nagbasa sa iyang gisulat.
Mas maayo pa gani nga maghisgot ang magdiskurso sa mga maayong buhat o gawi sa tawo nga ang pangalan iyang gilitok. Pero dili kini palabihan kay mogawas man sab nga pulos lang bolatik ang iyang tuyo.
Kon masulti na ang mensahi nga gusto niya nga ipaabot, angay lang nga tak-opan dayon kini og dili na magdaghan pa og sulti.
Daghan ang nalipay sa pagkatudlo ni Dr. William Dar isip Kalihim sa Department of Agriculture, labi na gyod sa mga opisyales sa DA.
Kahinumdoman nga migawas sa mga pahayagan ang gisulti ni PRRD nga basin og retirado nga opisyal sa military ang iyang ipuli kang Sec. Emmanuel Pinol.
Daghan ang naalarma niini.
Ngano man?
Tungod kay kon nahitabo pa kini, posible nga daghan nga mga kausaban ang mahitabo sa DA, labi na kay magtuon pa man ang maong retiradong opisyal sa iyang bag-ong trabaho.
Labi na gayod kay padung na sab magtuki sa national budget ang mga departamento sa gobierno.
Unsa kaha ang mga plano nga buhaton ni Sec. William Dar sa pagpalambo sa programa sa pagkaon sa nasod?