LEGAL ang operation sa Tourist Garden Hotel nga nahimutang sa Sityo Ibabao, Barangay Agus, Lapu-Lapu City base sa mga dokumento sa maong establisemento.
Personal nga gisusi ni Mayor Junard Chan ang naasoyng hotel ug nasuta nga kompleto kini sa mga dokumento sama sa business permit nga gi-isyu ngadto sa usa ka Zhao Long niadtong Enero 23, 2019.
Adunay sab silay certificate of business name registration gikan sa Department of Trade and Industry nga balido hangtod sa Oktubre 2023, lakip na ang Social Security System (SSS) certificate of registration ug ang dokomento gikan sa Bureau of Internal Revenue (BIR).
Natala diha sa business permit nga giluwatan sa Lapu-Lapu City Hall ang ‘Kind of Business or Occupation’ nga naglangkob sa hotel, beer retailer, liquor retailer, restaurant, salon & spa services ug videoke.
Way nakitang rason ang mayor nga momando sa pagpasira sa maong negosyo.
“Wa ta kahibawo og unsa to (pagbugaw sa mga babayeng Chinese national). Naa naman na sa NBI that is under investigation naman na nila. But in terms sa permit, kompleto sila ug in order tanan,” dason ni Chan.
Samtang si Kongresista Paz Radaza, lone congressional district of Lapu-Lapu sa iyang bahin, nakadayeg sa gihimo sa NBI.
“We have been working hard against human trafficking, in line with our efforts in improving the tourism and other industries in our City,” reaction ni Radaza.
Nanawagan ang kongresista ngadto sa mga konstituwente nga magmatngon niining matang sa illegal nga binuhatan kay babag kini sa kalambuan sa Lapu-Lapu.
Mosugyot si Mayor Chan ngadto sa konseho nga mogama og ordinansa nga nagmando ngadto sa tanang langyaw sa dakbayan nga nag-negosyo ug nanarbaho nga gikinahanglan hitsas sa working permit aron nga sayon sa pag-monitor sa ilang kalihokan.
Nasuta nga sagad nga kliyente sa maong hotel mga Chinese samtang pipila sa mga staff adunay Filipino.
“Upon verification, they can’t speak English, and there customers are non-English speaking Chinese,” tipik sa pamahayag sa opisyal.
Sa sayo pa, ang NBI nipahigayon og ronda niadtong Agosto 2 ngadto sa Royal One KTV nga nahimutang sud sa compound sa maong hotel nga miresulta sa pagkaluwas sa 34 ka mga babayeng Chinese nationals nga giingong gibugaw ngadto sa ilang mga kliyente sa maong establisemento.
Gani niadtong Lunes, Agosto 5 gipasakaan na og kasong qualified trafficking of person kadtong upat ka laing babayeng Chinese nga nagsilbing mamasang.