NAPILI nga host ang Lapu-Lapu City sa Asia Pacific Karate Championship nga gikatakda karong Septiyembre 27-30 sa Hoops Dome.
Moabot sa 500 ka mga atleta gikan sa Asia Pacific region ang mangapil sa kompetisyon, matod sa Public Information Office sa dakbayan.
Niadtong Lunes, Agusto 5, si Mayor Junard “Ahong” Chan nakighisgot kang Philippine Sports Commission (PSC) commissioner Ramon Fernandez kabahin sa ilang programa sa paugnat sa kusog.
Atol sa panaghugpong, nagkanayon si City Attorney James Sayson nga misaad si Fernandez nga mohatag og pinansyal nga suporta alang sa pagpalit og mga ekipo ug pagkuha’g coaches nga makabansaybansay sa batan-ong mga atleta sa grassroots sports program sa dakbayan.
Sa umaabot, mopirma og memorandum of agreement si Chan kauban ang PSC.
Isip usa ka mahiligon sa paugnat sa kusog, si Chan wala magmakuli sa paghangop sa obligasyon isip host sa Asia Pacific Karate Championship diin kaabag sa Lapu-Lapu City ang Karate Federation ug Department of Tourism.
Kauban ni Fernandez sa pagpakighugpong kang Chan mao sila si PSC-Philippine Sports Institute (PSI) for the Visayas Director Nonie Lopez ug Karate Pilipinas Inc. president Richard Lim. (PR)