MGA duwa sa Agusto 16 (Biyernes)
7:00 pm. - Naga batok Moalboal
9:00 pm. - Argao batok Badian
Human sa makutas nga paglatas sa elimination round, ang paglangkat og luna alang sa finals maoy anaa karon sa alimpatakan sa upat ka teams sa naghinapos nga 2019 Alcantara Mayor’s Cup Inter-town basketball tournament nga gipahigayon sa Big Dome sa lungsod sa Alcantara.
Ang Naga City, ang team nga walay pildi sa Bracket A sa elimination series, 4-0, makigsangka sa Moalboal, ang no. 2 team sa Bracket B nga may 3-1 nga baraha.
Samtang sa laing semifinals match, ang Argao (4-0), no. 1 sa Bracket B, makigtinaktakay usab sa Badian (3-1), ang no. 2 team sa Bracket A.
Ang modaog ning maong mga panagsangka mao ang mag-abot alang sa championship round nga ipahigayon gilayon sa Agusto 17, adlawng Sabado. Ang mga mapildi mao ang magsangka alang sa third place honor.
Ang makampyon mouli nga may P100,000, ang 2nd placer makabulsa og P50,000, makakuha og P30,000 ang 3rd placer samtang P20,0000 sa 4th placer.
Napulo ka teams nga nagagikan sa mga kasikbit nga mga lungsod ang ningsalmot sa torneto nga gipasiugdahan sa buhatan sa bag-ong napiling mayor nga si Mayor Fritz Lastimoso ug vice-mayor Felix Ferraren.
Ang kompetisyon nga adunay kinatibuk-ang P200,000 nga ganting salapi, gawas sa mga tropeyo, nagsilbeng usa sa mga kalihukan sa naghinangat nga kapistahan sa maong lungsod.
Miitsa sa ilang hugot nga suporta ang mga konsehales sa lungsod nga sila si Litoy Lambohon, Larry Llenos, Belen Lobitana, Richard Pulgo, Julie Bayato, Andres Timtim, Marvin Pulgo ug Joshua Catapusan.
Si Rey Canoy, usa sa pangabaga sa mayor, maoy magsilbing commissioner sa lega uban sa iyang mga coordinators nga sila si Jay R Justiniane, Woodrow Siya, Gammy Lastimoso ug Arthur Palencia. (JBM)