GILANGKAT sa University of San Jose Recoletos (USJ-R) Baby Jaguars ang korona pinaagi sa pagpukan sa Cebu Landmasters/Sacred Heart School-Ateneo de Cebu (SHS-AdC) Magis Eagles, 83-68, niadtong Martes, Agosto 6, 2019 sa deciding Game 3 sa Cebu Schools Athletic Foundation Inc. (Cesafi) 2019 Partner’s Cup high school division sa Cebu Coliseum.
Sama sa nangaging duha ka mga duwa sa series, dili lalim ang naagian sa Baby Jaguars una nila naangkon ang kalampusan gumikan sulod sab pipila ka mga higayon silang gihudlat sa Magis Eagles.
Kontrolado sa Baby Jaguars ang nag-unang tulo ka quarters apan gipanghudlat sila sa Magis Eagles sa 4th quarter diin ang katapusang higayon nahitabo sa nahabiling 5:42 minutos diin napahak ang dobleng numero nilang labaw ngadto sa duha na lang ka mga puntos, 62-64.
Sa pagpangulo nila ni Kevin Guibao ug Ryzel Abatayo, ang Baby Jaguars nakamugna og 10-0 run aron inaton og balik ang ilang labaw ngadto sa 74-62 sa nahabiling 3:09 minutos.
Napakgang ang pagsutoy sa opensa sa Baby Jaguars dihang nakamugna og puntos ang usa sa mga pambato sa Magis Eagles nga si LA Casinillo nga nagpahak sa labaw sa Baby Jaguars, 64-74.
Apan nimugna na sab og 5-0 run ang Baby Jaguars aron inaton pa ang ilang bintaha, 78-64.
Wala na nakabangon pagbalik ang Magis Eagles human niini.
Ang Baby Jaguars, nga karon pa nakatilaw og titulo sa Partner’s Cup, nagpanikad na sa ilang kampanya sa regular season nga sugdan karong Agusto 31.
“Basta naa lang sa good health ang mga bata, tan-aw nako naa ta’y chance sa regular season,” matod ni Baby Jaguars coach Edito Salacut.
Ang kadaugan gipangulohan ni Abatayo pinaagi sa iyang 28 puntos samtang si Guibao, kinsa maoy napiling MVP sa torneyo, nidugang og 23 puntos. (ESL)