MAO na kini karon tungod sa atong maayong relasyon sa China naikag ang mga Insek nga manganhi sa ato. Nia sila aron manarbaho. Ang uban nagnegusyo. Ang uban pud mga turista lamang.
Way makapugong nila nga manganhi. Nahibawo kaayo ta nga nanubra kaayo sila sa ilang nasod. Kon husayon nanag-ilog sila didto sa oportunidad nga makaayo sa ilang panginabuhi.
Adunahan tuod ang China, apan mag-unsa man ni kon nagsugwak sila didto. Wa lang ta mahibawo nga sila gidasig sa ilang kagamhanan nga manglangyaw sa mga nasod nga nihangop ug nagtuo kanila sama sa Piliptnas.
Maayo unta kon kadaghanan kanila buotan ug di badlungon. May nakit-an nga mga Insek dinhi sa Sugbo nagpabadlong kay mga hubog nga nakahadlok sa mga tawong gustog kalinaw.
Nagpasabot ni nga sila abusado nga sila na hinuon ang manghawod kay kanato. Imperial man gud ilang utok kay gikan sila sa nasod nga higante sa ekonomiya. Gani, sa sunod katuigan kon di kapugngan molabaw na sa Estados Unidos sa America.
Sa laing bahin, kuyawan ta kon sundugon ang paagi sa Japan kaniadto nga sa wa pa ang Ikaduhang Gubat sa Kalibutan daghan kaayo ang mga Hapon nga nanganhi sa Pilipinas.
Dihang miabot ang gubat kargado sa mga negusiyante mga opisyal diay sa Japanese Imperial Arm Forces . Naisan ta sa mga pikot niadtong tungora kay nakahatag nilag bentaha.
Nganong sila nakabentaha tungod kay suhito na sila sa dapit ug teranya sa nasod. Ingon ani ang kakuyaw nga giatubang sa atong seguridad. Hinaot nga nasayop lang ta sa atong pangagpas.
Nakit-an ra ba nga nagpaduol sa Tawi-Tawi ang Chinese military vessel. Kini karon ang gisusi sa atong naval authorities kon nganong nagpaduol sa atong teretoryo mismo.
Sayri Kini. Ingon unta niini ang himuon sa mga suluguon sa lungsod, Mosuroy unsay gikinahanglan sa mga tulonghaang publiko. Di pa dugay, nidonar si Konsehala Mytha B. Canoy og 6 ka pupil table sa Sangat Elementary School, Grade 1 Section 2 under ni Mrs. Gador ug PTA class president Rhudiza Lariosa Julom.