SUPERBALITA CEBU

Kaparian gilahugay; bag-ong assignments miepekto sa Martes

SA PAGLINGKOD sa bag-ong teams of pastors o mga pari sa lainlaing mga parokya sa Artsidyosesis sa Sugbo niadtong Martes, Agusto 6, 2019, nipaneguro ang usa ka opisyal nga haom sila nga modumala sa ilang bag-ong assignments.

Ang sobra sa 320 ka mga pari gikan sa 150 ka mga parokya sa pito ka mga distrito sa Artsidyosesis gilahugay og bag-ong mga parokya subay sa general principles ug mga lagda nga giaprobahan sa Archdiocesan Personnel Board (APB).

Niadtong Hunyo 14, 2019, gipahibawo ang ilang bag-ong assignments sa usa ka tigom sa San Pedro Calungsod Chapel and Social Hall sa South Road Properties.

Apil sa gihatagan og assignments ang mga pari nga nag-atubang og mga kontrobersiya. Kini sama sa pari sa siyudad sa Mandaue nga giakusahan nga nidagmal og menor de edad nga dalagita ug pari sa lungsod sa Dumanjug nga gipasanginlan nga nimolestiya og menor de edad usab.

“I think gi-consider nila ang place of assignment nga it should be healthy for them and healthy for the community ang ilang presence,” sigon ni Msgr. Joseph Tan, media liaison officer sa Artsidyosesis.

Si Padre Ramon Echica, dean sa Theology Department sa Seminaryo Mayor de San Carlos, maoy gitudlo sa Board of Consultors ug naghimo sa mga lagda nga maoy sumbanan sa pag-assign og mga pari sa mga parokya, unsa ang proseso nga subayon ug kinsa ang mo-qualify nga mahimong administrador sa parokya o mangu sa team ministry.

Sumala ni Tan ang prinsipyo, kon gikan sa probinsya ang pari sa wala pa ang lahugay, anha kini ibutang sa duolduol nga parokya ug kadtong gikan sa duolduol nga parokya, adto ibutang sa probinsya sa bag-ong assignment.

Siya niklaro nga kon team moderator ang usa ka pari sa iyang kanhi gialagaran, wa nagpasabot nga kini usab ang mahimong team moderator sa bag-ong parokya nga alagaran.

Apil sa tan-awon sa pagpili og team moderator kinahanglan matured kini, maayo nga leader, taas og kasinatian, dunay igong kapasidad, ug dili molapas sa 65 anyos ang edad.

Apan dunay exemptions sa mga lagda, sama sa kon naghupot og senior position ang pari, dili kini mabalhin og lagyo nga parokya sama ni Msgr. Raul Go, judicial vicar sa Metropolitan Tribunal sa artsidyosesis.

Gikan sa Sto. Tomas de Villanueva Parish sa Barangay Poblacion Pardo, siyudad sa Sugbo, si Go mabalhin sa Cebu Metropolitan Cathedral, duol sa iyang buhatan sa metropolitan tribunal.

Ang bag-ong naordinahan sa pagkapari dili una idestino og dagko nga mga pari aron dili makalitan sa daghang mga parokyano.

Sumala ni Tan human ma-formalize, mapresentar ug maaprobahan ang bag-ong assignments, duna gihimo nga adjustment nga gitugot ni Arsobispo Jose Palma alang sa hamtong nga mga pari.

“For some reasons, they need to be in some place because of reasons of health or because of their age.

Naay preference nga ari lang ko diri nga parokya, duol ra sa doctor. So, it was allowed,” pagpasabot ni Tan dihang nahinabi sa Superbalita Cebu niadtong Lunes, Agusto 5, 2019.

Wa gisalikway sa tigpamaba sa artsidyosesis nga dunay mga pari nga wa makauyon sa ilang bag-ong parokya nga dumalaon.

“But wala kaayo na mapagya, wala kaayo na ma-issue. This year wala kaayo na ma-issue kay for me tungod sa meticulous process nga na-involved. And in general, ang marjority of the priests are satisfied with the results of the assignments,” dugang ni Tan.

Si Tan nidugang nga kapila ka higayon gi-review ang listahan sa assignments ug si Palma nidistansya sa iyang kaugalingon sa proseso.

”But at certain points when needed, he will step in unyaand make the appropriate decision. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph