SA IKATULO ka adlaw, padayong giisa ang Gale Warning sa Central Visayas diin pabilin nga gidid-an ang mga sakyanan sa pagbiyahe sa kadagatan.
Kini human nga gipahibawo sa Philippine Atmospheric Geophysical and Astronomical Services Administration (Pagasa) Visayas nga padayong Rehiyon nga makasinati og kusog nga hangin pat-ak pat-ak nga uwan ang lukop Central Visayas hangtod Biyernes.
Matod ni Engr. Al Quiblat, ang officer-in-charge sa Pagasa Visayas, nga mas nihinay ang dagan sa bagyong Hanna tungod sa tropical depression sa Pacific Ocean nga maoy nakaapekto sa pag-irog niini.
Uwahing nasigpatan ang Bagyong Hanna nga may 795 kilometros sa sidlakan bahin sa Calayan, Cagayan ug gituohan nga dili na nga mo-landfall.
Laing gibantayan karon sa Pagasa ang low pressure area sa West Philippine Sea. Matod pa nga minus ang kahigayonan niini nga mamahimong bagyo.
Dugang ni Quiblat nga gikatakdang mogawas sa Philippine Area of Responsibility (PAR) ang bagyong Hanna sa Biyernes sa hapon.
Moabot ngadto sa 49 ka barko ang pabilin nga wala pabiyahea kagahapon, Agusto 6.
Si Quiblat nagkanayon nga anaa sa 50 ngadto sa 60 kilometros matag oras ang gikusgon sa hangin nga masinati karon sa Central Visayas ug may tres ngadto sa kuwatro metros ang gitas-on sa hapak sa mga bawod.
Mga biyahe sa mga barko nga ania sa Sugbo nga posibling maapektohan mao ang paingon sa Bohol, Leyte, Negros, Panay, ug uban pa.
Apan kagahapon sa buntag, gipahibawo sa Ocean Jet nga nahibalik na ilang biyahe gikan Sugbo paingon sa Tagbilaran ug Ormoc City. (HBL)