PITO ka pamilyahan diha sa barangay Poblacion sa Syudad sa Talisay nga nagtukod og mga balay ug tindahan kangsang luna iya sa gobyerno ang gimanduan sa pagguba sa ilang estraktura sulod sa usa ka buwan.
Ang maong pito ka balay anaa nahimutang atbang lang sa barangay hall ug duol ra sa Talisay City Police Station.
Matod ni Police Major Orlando Carag Jr., ang hepe sa kapulisan, nga Lunes sa buntag, Agusto 5, uban si kapitan Eduard Alesna, ug City of Talisay-Traffic Operations Development Authority head Jonathan Tumulak nihimo og pagsusi sa barangay.
Kini kabahin na sa pagpatuman sa discipline zone ug sa programa sa gobyerno ni Presidente Rodrigo Duterte nga ipakuha ang mga luna sa gobiyerno nga daplin sa dalan aron kini magamit sa publiko. Nasuta nga kasagaran kanila kapin na napulo ka tuig.
Giangkon hinuon ni Teresita de Lima, 61 anyos, usa sa mga nanagpuyo, nga daan na sila nakahibalo nga bisan unsa nga panahon kon gamiton na sa gobyerno ang luna, gikinahanglan gyud sila mopahawa.
Si de Lima 19 ka tuig nga nagpuyo sa maong dapit, misaysay nga una naghimo siya og gamayng bar-bequehan hangtod nga nidako kini nga tindahan ug nihimo na gyud nga pinuy-anan sa iyang pamilya.
Gani aduna na siyay walo ka apo, diha sa maong lugar.
“Gipahibalo mi nila kap, wala ra man sad mi mosukol, kay kahibalo man mi nga iya gyud ni sa gobyerno, dili man sad gyud nga pahawaon mi, ipasibog lang mi og usa one and a half meter ta to. Si kapitan nihangyo ni mayor nga one meter lang, para naa pay mabilin namu nga tindahan. Nakasabot gyud mi ug pasalamat gani mi, nga gisabot sab mi,” saysay ni de Lima sa Superbalita Cebu.
Hinuon dili lang sila ang gipasibog kon dili lakip na usab ang uban nga may carenderia, tindahan o balay. (FMD)