2 ka kontraktor ipa-blacklist ni Ahong

IPA blacklist unya ni Lapu-Lapu City Mayor Junard “Ahong” Chan ang kontraktor nga nagtrabaho sa Lapu-Lapu City District Hospital.

Kini kung dili matuman niini ang saad ngadto sa mayor nga humanon ang structural nga bahin sa extension building sa naasoyng tambalanan sa buwan sa Septiyembre.

Samtang sa buwan sa Disyembre kinahanglan nga mahimo ng magamit ang naasoyng building, matod sa mayor.

Kini ang ilang nasabotan uban sa Department of Health DOH ug sa duha ka kontraktor nga mao ang MOM Construction ug JO Builder dihang nagtagbo sila aron masiguro ang klarong paghuman sa extension building sa naasoyng tambalanan.

Matod ni Chan mipirma gayud ang duha ka kontraktor nga tumanon ang ilang saad ug dili lang kutob sa estorya.

Alang kang Chan sobra na kalangay ang naasoyng proyekto nga adto pa untang 2016 mahuman ang first phase samtang 2018 ang ikaduhang phase apan wala pa gyud gihapon mahuman ang trabaho karon nga milingkod na siya isip mayor sa dakbayan.

Kung problema lang sa tawo ang suliran sa kontraktor sa ilang langay nga pagtrabaho sa tambalanan daghan ra untang trabahante sa dakbayan nga mahimong kuhaon sa duha ka kontraktor aron mapadali ang ilang trabaho sumala pa ni Chan.

Gawas nga ipa blacklist mag-atubang usab kini og laing multa ug dugang pang mga kaso kon dili gayud nila matuman ang ilang saad.

“Mao nay dili nato masabtan nga naa man unta ang fundings sa DOH but wa gyuy pagpakabana ang kontraktor sa mga kinahanglanon nato sa syudad mao gipabayaan na lang sad nila,” matod sa mayor. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph