MGA kompanya nga tag-iya og dagkong truck, van ug Cargo, ang giawhag sa kagamhanan sa syudad sa Talisay nga mas maayong mo-schedule na daan sa ilang byahe diha sa pag-agi sa Syudad sa Talisay karong Dominggo.
Kini tungod kay masirad-an sulod sa pito ka oras ang South Coastal Road habig sa dakbayan sa Talisay paingon didto sa South Road Project sa dakbayan sa Sugbo alang sa dakong sporting event nga mao ang Regent Aguila Ironman 70.3 Philippines.
Ang mga nahisgutang dapit hangtod sa atubangang bahin sa Talisay City Hall nalakip sa rota sa biking stage sa maong kompetisyon.
Sugdan kini sa pagsira sa alas singko sa kadlawon hangtod na ngadto sa alas 12 sa udto. Dili usab paagian sa mga dagkung truck ang Mananga bridge nga sa kasamtangan padayon nga giayo ang pikas nga habig.
Si Jonathan Tumulak, ang traffic head sa Talisay, una nang mipahibaw nga ilang nasabutan sa Department of Public Works and Highways (DPWH) 7 nga ang parte sa taytayan sa Mananga nga maagian na sa mga sakyanan nga padung sa habagatang bahin sa Sugbo, ang gamiton isip duha ka lane.
Lakip sa tugotan nga makaagi ang mga bus depasahero.
Gikataho usab nga ablihan sa makadiyot sugod sa alas sai’s sa buntag karong Sabado ang pikas habig nga padayon nilang gitrabaho sa maong taytayan. Kini hangtod sa Lunes sa tungang gabii, Agusto 12. Hinuon, kadto lang mga gagmayng sakyanan ang paagi-on.
“Atong awhagon kining mga delivery ug katong mga dagkong trucks, atong hangyuon sila nga dili lang sa sila mogawas gikan sa alas 5 sa kaadlawon hangtud sa alas 12 sa udto, aron atong maminusan ang problema sa traffic, kay ang atong bugtong maagian going to Cebu City, mao nalang gyud ning’ Mananga,” panawagan ni Talisay City Mayor Gerald Anthony “Samsam” Gullas.
Matod ni Gullas nga ila karong nalantawan nga aduna gyuy paghuot sa trapiko nga mahitabo ning adlawa hinungdan nga ning sayo pa lang nihimo na sila og traffic advisory ug nagpahinumdom sa mga motorista ug sa publiko.
Diin dili lang mga dagkong truck ang mo-schedule na daan sa ilang mga lakaw, apan bisan na ang mga adunay plano karong Dominggo. Ang pagsirado sa Cebu South Coastal Road ang angay usab nga ibalanse ug maapil sa plano sa pamilya, barkada ug uban pa.
Hangyo sa mayor nga mosabot lang una sa sitwasyon, kay ang maong kalihukan usab man ka international event nga makahatag usab og dakong dungog sa nasod, ilabi na gyud sa Sugbo, ngadto sa tibuok kalibutan. (Fe Marie Dumaboc)