POSITIBO nga gidawat ni presidential daughter ug Davao City Mayor Sara Duterte-Carpio ang sisterhood proposal sa Probinsya sa Sugbo pinaagi sa suwat nga gipresentar ni Gobernador Gwendolyn Garcia ngadto kaniya sa Martes sa buntag sa social hall atol sa ika-450 nga kasumaran sa pagkatukod sa Lalawigan sa Sugbo.
Si Garcia nangunay sa pagtunol ngadto kang Carpio sa letter of intent.
“Despite differences in population and land area, both local government units can learn a great deal from each other by sharing strategies, experiences and policies in areas of urban planning development, socio-cultural programs, education, health, disaster and risk management, community organization, tourism and local governance,” suwat ni Garcia.
Si Carpio mao ang espesyal nga bisita sa Kapitolyo atol sa kalihukan niini.
Matod ni Carpio nga pinaagi niini, di na kinahanglan nga magmugna pa og mga bag-ong programa ang iyang siyudad tungod kay mamahimo lang niini nga kopyahon ang mga pamaagi sa Probinsya sa Sugbo.
Usa sa mga buot kab-uton sa Siyudad sa Davao ang gilaraw usab sa probinsya nga mahibalik sa unang pwesto sa tibuok nasud.
“Never pa mi nag number one city ang Davao City pero that is something nga pwede namong tan-awn nga basin pa diay nga bisan tua mi sa Mindanao, medyo dehado ang among location. But libre ang mangarap. Basin pa diay nga moabot ang panahon with the experiences and the best practices of Cebu province, pwede namo mabuhat sa among lugar”, saysay ni Carpio. Nisugyot usab si Carpio og mga programa ug proyekto nga mahimong gamiton sa Probinsya sa Sugbo.
Kini sa hugot nga programa sa peace and order, integrated gender and development program, disaster risk reduction preparedness ug response ingon man ang malambuon nga agrikultural nga bahin sa siyudad.
Daghan na ang midayeg sa pamunuan ni Carpio, apan matod niya nga wa pa sa iyang huna-huna nga musunod sa yapak sa iyang amahan ug mudagan isip presidente sa nasud karong umaabot eleksyon sa 2022.
“Wala, wala pa mi nagsugod ug huna-huna about 2022.. busy pami didto sa Davao City to make sure nga dunay gains ang Davao City sa administration ni President Duterte aron dili sad ma-disappoint ang mga Dabawenyos not just the City but tibuok Davao Region”, matod ni Carpio.
Gipasalamatan usab ni Carpio ang mga Sugboanon sa pagsuporta sa iyang amahan nga si Presidente Rodrigo Duterte atol sa 2016 elections. (ANV)