SECTIONS
Saturday, September 21, 2019
PAMPANGA

Garcia: Talikalang Payabut: Malalam a Isip king Nung Sanu ing Mali o Makatud (Chain Messages: Deep Discernment of What’s Wrong and What’s Right)

Kapisik

“Ing panga-miyaslagan makikilala anting pamanakit karing bage-bage nung makananu lang tagana kesa keng nung makananu la mayayakit; taglus-taglus yang panakit kilub, at ing malalam a isip king, ing likas king katutwan masasanak mu kapamilatan ning tenakan, a lalagpus at mumuna king pamigunyat ning mapamiling pamisip.” ~ Kim Hee-jin

“Ing karalumduman masasambut kapamilatan ning pamangdagdag king sala ning pamisip, e king pamanira king dalumdum.” ~ Socrates

“Ding pinili ku, kambe ring nanu mang makasuglung king pang-aldo’ldo sangkap ning bye antimo king pamangamit king mura mung saken, makasuglung la king malalam a pamisip ning diwa a makibat king pamangaylangan a manibatan king pamaglalawe karing bage-bage, at tau at ibat king pamamasa karing tanda na ning panaun.” ~ Pope Francis

“E ta sukat mimimwang labis king milabas, at e tamu naman paybalisa dikil keng payntungul. Ding taung malalam pamisip lilingunan da mu ing pangsalungsungan a penandit.” ~ Chanakya Pandit

***

Malalam a isip o pamisip. Agyu tamung gawan yan nung masipag tamu at matyaganmg pakibalwan ing katutwan gamit ing makatud a paralan.

Aliwa itang tanggap tamung tanggap karing nanu mang akakit, darandaman, ababasa, apapanalben at amamalit king nanu mang paralan at tanggapan ta na ngan iti anting katutwan at makakayap kekatamu.

Dakal a belwan ing mayayakit keng internet o kanitang minuna -- karing miyayaliwang aklat -- dapot miyalilan lang newspaper, radio, TV at miyayaliwang paralan ning pamitalastasan.

Ing internet simbut na la ring mangaragul a aklatan o library at pati na ding museum anting pikwanan karing miyayaliwang belwan bang ayantabayanan da katamung abalu nung nanu man ing pantunan tamung katutwan.

Ing pisasabyan keni aliwa mu ing keng kasalpantayanan nung e karing sablang dake ning pamibye-bye tamu. Kumwari deng chain messages -- dakal la reni keng Facebook messenger -- a parati tamung atatanggap kareng ka-Facebook tamu, e keraklan karela scam la mo? Nanung sangkan o’t ating gagawa at dakal la reng gagawa kareng chain messages anti kanitang minunang panaun a chain letters no man pa kanita?

Tutu lang magmalasakit deng paralang chain letters o messages? Nung i-search la keng Snopes.com tambing abalu la nung scam la mu o hoax la mu pala. Dakal la kasing bisang sumikat. Dakal lang mamulang. Dakal lang magmulang ba’lang manakitan. Dakal lang murit a matula nang abalu dang midarake kareng chain letters o messages a gagawan da.

Buri da mag-trending la! Buri da akit de ing gewa dang chain message a mibalita keng social media pati na mainstream media. Buri da sumikat la keng Facebook o keng YouTube at malyari lang manakitan kanita. Makananu? Deng kasing alus gagawa kareng fake news o hoax keraklan makasuglung la kareng churches o pisamban, schools o pipagaralan, o scientific organization at nung apag-trending de ing chain message da malyari lang pa-sponsor keng church da at mika-funding la. Manakitan la.

Maralas deng magpadalang chain messages kekatamu kakaluguran ta la oneng e na buri sabyan nita asuri da no reng parala dang message nung tutu la o ali. Misan pin atin la pang virus inya lalung delikadu. E bala namung asusubu yakmul tamu.

Makanyan man, katungkulan tamu keng sarili tamu ing mingat at pakibalwan nung tutu la reng mipaparalang message kekatamu. E bala naming padala da reng kakaluguran tamu mayap o tutu. Itamu ing maki-masabal pakibalwan nung tutu o ali, mayap o marok ing tatanggapan tamu. Nung ali -- malyari tamung mangalat virus o mali mung balita. Maka-addict mu naman ing magpasang-chain messages at dakal na lang kakilala ku reng makanyan.

***

Dake Talabaldugan:

isip – (palagyu) panamdam, atul, pamanatul. English: sense, judgment, conclusion. Alimbawa king pamangamit: “Isip da reng tau mayap yang tagana i Isku agya mang ing gagawan na tungkulan na naming pengaku nang tuparan.”

isip¹ – (palagyu) palage, munikala. English: criterion, opinion. Alimbawa king pamangamit: “Buri naming abalu ing isip yu ning pari dikil keg pisasabyang pamamuklat pasibayu keng pasbul lele pisamban inya pepayaus na katamu ngan.”

isip² – (palagyu) lawe, pamaglalawe, pangamapanyuri, panakit, pansing, lingun. English: discernment. Alimbawa king pamangamit: “Keng kasalungsungan panaun kaylangan tamu ing isip bang abalu nung ninu reng tune o magkumwari mung talasuyu ning kekatamung balen.”

isip³ – (palagyu) dalumat, bungang isip. English: idea, concept. Alimbawa king pamangamit: “E ya king gamat makikilala ing metung a talagulis o talasulat nung e king lalam at sampat na kabaldugan ning kayang isip.”

isip4 – (palagyu) gelingan king kapamaralanan, sikan ning kegiwan kumudta. English: ingenuity. Alimbawa king pamangamit: “Keng pamung kanwan nang Ikang akit mu na ing makalulan nang isip keng kayang matning buntuk.”

***

Gawing mekalingwan karing Kapampangan!

Munikala. Isip. Opinion o suggestion. Neng ating pulung da reng kabalen tamu balang metung anyaranan lang kapirasung dake ning isip da o munikala. Anak at matwa kukutnan la nung nanung malyari dang aibye paralan nung nanu man ing sigalut a daralanan da. Makanyan man, deng makatwa at lalu na ing matwang dili yang pekapaulagan da munikala at ya ing mamilatan nun gating mipagkatwa o mitataltalan uling e la makapagpasay nung sanung munikala ing dapat tukyan. Malagad na ngeni ing antining gawi uling deng tau ngeni ing internet yang panwalan da.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan. Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph