DILI na pabalikon ang mga residente nga naapektuhan sa habagat sa ilang mga lugar diin asa gipangguba ang balay sa dagkong mga balud daplin sa kadagatan sa Davao City.
Kini ang giingon sa City Disaster and Risk Reduction Management Office (CDDRMO) kay nakita ang kapilegro sa dapit.
Tungod niini, gilayong mitabang ang lokal nga kagamhanan ning dakbayan sa 522 ka mga pamilya diin mga pinuy-anan apektado sa dagkong mga balud daplin sa baybayon, Sabado sa kaadlawon.
Si CDDRMO chief Alfredo Baloran nagbutyag nga mga naapektuhan nga mga barangay niabot na og siyam nga mao ang 21-C, 22-C, 23-C, Matina Aplaya, Gov. Duterte, Lapu-Lapu, Bago Aplaya, Bucana (76-A), ug Brgy. Daliao.
“Gina-encourage namo sila nga di na sila mobalik sa area, kay ma-disturbo man gihapon ilang pamuyo,” tin-aw ni Baloran human sa flag raising ceremony niadtong Lunes sa City Hall sa siyudad sa Davao.
Dugang niya, “Kung kami lang sa CDDRMO, bawal gyud na siya. CDDRMO has recommend na malimpyo ug mahawa sila kay delikado man ilang life all the time.”
Bisan og unsaon pagsulti sa gobyerno nga di na mobalik sa mga dapit nga gitarokan sa mga balay nga giguba sa balud, mobalik gihapon ang mga residente gumikan anaa sa duol ang ilang panginabuhian.
Kung hatagan man sila og relokasyon, apan layo sab kini kaayo, didto na kini sa Tugbok District maong daghan ang wala mipuyo sa gitagana nga relokasyon.
Maong human sa habagat, sa paglinaw sa dagat, hayan mamalik na sab sa pagpanday og mga balay ang mga residente.
“Hinuon, wala man ta nalisdan kay advance info dissemination naman ato gihimo. Naa lang uban nagmagahi kay ang katarungan nila is that, anad na sila sa ana nga sitwasyon. Pero wala nila na-anticipate unsa kadako sa balud na ang ilang sagubangon,” pagklaro niya.
Kung gitan-aw ang kalamboan sa siyudad kinahanglan mapatuman gayod nga wala na’y mamalik nga mga barong-barong diha sa kadagatan ning dakbayan sa Davao.
Kinahanglan dunay relokasyon aron sa ingon mahan-ay ang pagkabutang sa mga pobre nga mga residente.