KIDAPAWAN CITY -- Patay ang anay nga baboy, apil ang iyang unom ka mga baktin sa pagkasunog sa 12 ka mga balay sa dakbayan alas 8:30 a.m., Lunes, Agosto 5.
Gituohang depektado nga linya sa kuryente ang hinungdan sa pag-ulbo sa kalayo.
Sa taho gikan City Fire Bureau, nasayran nga nakadawat sila og impormasyon sa sunog nga natigayon sa Purok Chiko, dalang Mariano Cuenco, Barangay Poblacion sa dakbayan.
Abtik nga nagresponde ang mga bombero sa siyudad uban ang Rescue 911 sa nasunogan.
Apan dako na kaayo ang kalayo ug naugdaw gilayon ang 12 ka balay nga gama lang sa kahoy.
Nalisdan sab og sulod ang mga fire truck sa purok o gitawag sab nga Kalye Putol, gumikan sa kapiot sa dalan.
Giingong nagsugod ang kalayo sa balay nga gipanag-iyahan sa usa ka Abelgas gumikan matud pa tungod sa pagkalayo sa plangka sa kuryente.
Dunay gikataho nga 4-anyos nakulong sa kuwarto sa usa sa mga balay nga nasunog apan luwas kining nakaambak sa bintana nga diretso sa sapa.
Apil sa naugdaw mao ang tulo ka motorsiklo ug usa ka binuhing iro.
Samtang, dunay 104 ka mga indibiduwal naapektuhan sa sunog ug temporaryo nga gipapuyo sa basketball court sa Barangay Magsaysay. (Edgar E. Fuerzas)