GIKALIPAY ni Misamis Oriental Governor Yevgeny “Bambi” Emano ang pagkabalik ni kanhi board member Prexy Elipe isip manager sa Misamis Oriental Integrated Sports Complex (MOISC).
Matud ni Emano nga bisan kadtong sakop sa board of directors nga naghatag og affidavit ug nikwestyon kaniadto sa pagka-appoint ni Elipe ang miboto pabor kaniya.
“Lipay kaayo ko sa atong board sa MOISC kay ilang gihalad ilang pagsalig ngadto kang kanhi board member nga makabalik sa MOISC ug tataw bisan kadtong naghatag ug affidavit kaniadto, voted in favor nga mobalik gyod pagka manager si Prexy,” matud ni Emano sa SunStar Superbalita.
Adlaw’ng Martes, Hulyo 30 gipili sa sports council si Elipe nga mobalik sa pagka general manager.
Niadtong pagka-appoint ni Elipe isip sakop sa board member ug padangaton dayon ang eleksyon si Frose Radelyn Barros ang nahimong MOISC officer-in-charge ug lakip kini sa ginominar apan gibalibaran niini.
Ang miyembro sa Misamis Oriental sports Council gilangkoban nila ni Governor Bambi Emano nga girepresentahan ni Atty. Irish Bermudez; Cagayan de Oro City Mayor Oscar Moreno nga girepresentahan sab ni Oscar Cinco; ug Misamis Oriental Schools Division Superintendent Randolph Tortula.
Anaa sab sila si Cagayan de Oro Schools Division superintendent Jonathan Dela Pena nga gipresentahan ni Eulogio Suaner Jr.; Misamis Oriental General Comprehensive High School (MOGCHS) principal Pedro Estano Jr.; MOISC treasurer Peter Elman; MOISC secretary Engineer Ferdinand Batar; MOISC legal counsel lawyer Melchor Cubillo, ug Barros, MOISC-OIC.
Si Elipe nipatuman na og mga kabag-ohan sa sulod sa Sports Center ug buot pa niining mapalambo ang sulod niini.