LAWOM nga imbestigasyon ang gihimo sa kapolisan sa Valencia City Police Station kalabot sa kamatayon sa usa ka sales lady sa Valencia City, Bukidnon.
Gibuyag ni Valencia City Police chief Lieutenant Colonel Surki Sereñas nga gikuhaan na nila og mga sample ang suspek ug gipaabot na lamang ang resulta niini.
Apan niadtong tungora, walay nibarog nga witness hinungdan nga ila kining gibuhian.
Dihang nagpadayon ang imbestigasyon, gi-report sa pamilya nga nawala ang cellphone sa biktima atol sa hitabo hinungdan nga ang Cyber Crime group nag-locate sa lugar kon asa ang cellphone niini.
Matud ni Sereñas sa SunStar Superbalita nga pag-ambak nila sa lugar nga gihatag sa Cyber Crime group nakurat sila nga lokasyon gihapon sa person of interest hinungdan karon ang kapolisan nagpasaka na og kaso batok sa suspek.
Migawas na usab ang medikal eksaminasyon sa dalaga ug positibo kini nga gilugos.
Kahinumduman nga naligo sa iyang kaugalingong dugo, samaran ang liog ug gitouhang gilugos human hubo ang 26 anyos nga babae nga napalgan wala nay kinabuhi sulod sa apartment nga gipuy-an niini sa Pepito Street, Barangay Poblacion.
Ang 26 anyos nga dalaga kinsa gihangyo sa pamilya nga itago ang identipikasyon ang trabahante isip sales lady sa usa ka appliance center sa maong siyudad ang nag inusara lamang niadtong gabhiona human wala natulog ang ayaan niini sa ilang boarding house nga giabangan.
Ang suspek gituohan sab nga mao ang lalaki nga nakita sa closed-circuit television camera nga nagsulod sa aparment mga alas 1 sa kadlawon.