NAGPAGAWAS og pahayag ang pamilya sa giakusahang wakwak sa Barangay Consolacion, dakbayan sa Cagayan de Oro human kini nigawas sa national television adlaw’ng nga Dominggo, Agusto 4.
Nasayran nga kini ang gitumbok nga wakwak nga maoy gikagubtan sa Barangay Consolacion.
Sa post sa usa ka Jastine sa social media ig-agaw mismo sa nailang si Manang Inday nga gipasanginlang usa ka wakwak.
“I am posting this as an awareness that the woman who is allegedly judged as WAKWAK in Brgy. Consolacion, CDO, is a person with epilepsy and a special person whose mental capacity is below normal aside from the evident fact that she has a physical disability,” pahayag niini.
Giingong duna kini gihambin nga balatian nga epelipsiya ug dunay kabilinggan sa panglawas ug panghunahuna.
Gidugang pa niini nga gani kanunay kining gasimba ug kung usa pa kini ka wakwak dili na unta kini mosulod sa simbahan.
Naghangyo ang pamilya nga hunongon na ang sayop nga akusasiyon ilabi na nga dugang kini sa ilang kasub-anan labi na sa kang Manang Inday kinsa bag-ohay lang nga na-ilo sa mga ginikanan diin niadtong Hunyo 12 namatay ang amahan ug sunod usab nga namatay ang inahan niadtong Hunyo 20.
“The allegation does not help the family and us, their relatives, who are still in recovery after the loss of her parents,” dugang pa.
Kahinunduman nga nahinabi sa SunStar Superbalita kaniadto ang 16 anyos lakip na ang pamilya niini nga giingong nakuhaan sa gimabdos human giingong giwakwak apan wala silay gitumbok nga gidudahan sa maong dapit.