MOABOT na 60 ang natalang patay tungod sa dengue gikan bulan sa Enero 1 ngadto sa Agusto 3 ning tuig sa tibuok Northern Mindanao.
Tungod niini, posibleng sa bisan unsa nga oras madeklara kining outbreak.
Ang labing daghang kaso sa namatay mao ang Lanao del Norte, 15; Misamis Oriental, 13; Iligan City, 11; Bukidnon, 10; Cagayan de Oro, 8; Misamis Occidental, 2 ug Camiguin, 1.
Mokabat ngadto sa 15,095 ang natalang kaso sa dengue sa Northern Mindanao ug anaa sa 62.54 porsinto ang pagtaas kumpara sa nilabay nga tuig.
Ang Bukidnon ang dunay pinakadaghang natalang nataptan sa dengue virus nga anaa sa 6,406 diin kasagaran lalaki nga nagpangidaron og 1-10 anyos.
Anaa usab sa 1,557 ka kaso ang natala ning sa dakbayan Cagayan de Oro ug walo niini ang patay diin labing daghan nga kaso sa Macanhan, Barangay Carmen nga anaa sa 32 ka kaso ug duha ang patay.
Gibutyag ni Dr. Adriano Suba-an, officer-in-charge sa Department of Health (DOH), nga grabe na kini ka alarming ug gani posibleng ideklara na ang outbreak sa dili madugay nga panahon.
“It is very alarming in fact we had already exceeded the epidemic threshold,” matud ni Suba-an. “And if you’re going to ask sa situation sa region, yes we are already going beyond the epidemic threshold and its alarming,” dugang pa.
Naghangyo ang tinugyanan sa DOH nga manglimpyo ug kinahanglan nga patyon ang tanang lamok ug dili na hatagan og higayon nga makadapat sa panit ug makapaak.
Naghangyo usab kini nga kanunayon ang pagpanglimpyo matag alas 4 sa hapon.
“We are encouraging sa mga lumulupyo nga nagpuyo diri sa Northern Mindanao nga at least once a week or everyday at 4 o’clock in the afternoon manglimpyo tang tanan,” dugang niini.
Gipahigayon usab ang 4’o clock habit sa tibuok nasud diin sa siyudad gipahigayon kini sa Sitio Macanhan sa Carmen diin maoy dunay pinakadaghang natalang kaso sa dengue.