BABAYE nga nalakip sa high-value target sa Cebu City Police Office ang nasikop sa mga sakop sa City Intelligence Branch (CIB) sa buy-bust operation alas 4:40 sa hapon, Martes, Agusto 6, 2019.
Gipangulohan ni Police Major Keith Allen Andaya ang maong operasyon.
Giila ang nadakpan nga si Ruby Caang Fernandez alyas “Ruby,” 30, taga Purok 3, Barangay Kamputhaw.
Naatol usab nga mipalit si Edgardo Montesclaros Salcedo alyas "Junior," 35, taga City Central, Barangay Luz, Dakbayan sa Sugbo nga giapil nga giposas.
Nakadawat og impormasyon ang CIB gikan sa mga nagpakabana nga molopyo sa Barangay Kamputhaw labot sa ilegal nga negosyo sa duha nga mao'y hinungdan nga gipaubos sila sa surveillance.
Human masuta nga positibo ang kasayuran, ila dayon gilusad ang buy-bust operation nga miresulta sa ilang pagkasikop.
Matud ni Andaya nga ang ilang target mao si Fernandez apan naatol usab nga aduna'y mipalit kaniya sa mga pinutos sa ilegal nga drugas.
Nakuha gikan sa mga dinakpan ang 13 ka gagmay ug upat ka medium size nga putos sa gituohang shabu nga motimbang sa 30 gramos ug mobalor sa P204,000.
Ang mga dinakpan moatubang sa kasong kalapasan sa Republic Act 9165, o ang Comprehensive Dangerous Drugs Act of 2002. (Superbalita Cebu)