BIHONAN sa siyudad sa Talisay nga gipasirado sa niaging semana tungod sa daghang kalapasan niduso ug motion for reconsideration sa lokal nga kagamhanan para maka-operate sila balik.
Apan, hugot ang baruganan sa mga opisyales sa siyudad sa Talisay nga dili paablihan ang maong bihonan sa Barangay Cansojong hangtud nga masunod niini ang mga kondisyones nga gilatad niini sa ilang closure order.
Giangkon ni Atty. Rudelyn Navarro, Talisay City administrator, nga niduso og MR ang pabrika sa bihonan ug pansitan niadtong Lunes sa buntag, Agosto 5.
Apan gitambagan sila sa kagamhanan sa pagsunod sa mandu sa Department of Energy (DOE), kalabot sa kaso niini nga pagkalambigit sa kawat sa uling nga gisakmit sa gobyerno.
Ang DOE 7 atol sa ilang tigom niadtong Lunes sa hapon nipakita sa kopya sa show cause order ngadto sa tigdumala sa maong pabrika.
Kahinumduman nga nipakanaog sa kamanduan si Talisay City Mayor Gerald Anthony "Samsam" Gullas Jr. sa pagpasira sa kompaniya niadtong Huwebes sa hapon, Agosto 1, subay sa giatubang niini nga kaso nga pagkalambigit sa pagkawat sa P33.2 milyones nga balor sa uling.
Matud ni Navarro, kon makakuha lang ang President Food ug CitiFood og clearance gikan sa DOE-7 ug ang pasulbad sa problema sa sanitation ug drainage sa kompanya, hayan nga libkason dayon na sa Talisay City Hall ang closure order.
Gipaniguro nila nga masunod ang closure order, hinungdan nga himuon ang monitoring matag semana.
Kon dili mosunod, hayan nga laing kaso ang atubangon sa kompanya gikan na sa kagamhanan.
Samtang bisan pa man sa pagpasira sa maong bihonan sa niaging semana, gitug-an ni Felipa Solana, ang pangulo sa City Social Welfare Office (CSWO), nga walay bisan usa nga trabahante niini ang nibalik ning semanaha aron sa pagkuha og pinansyal nga hinabang gikan sa kagamhanan.
Giklaro ni Solana nga kadto lang gyud molupyo sa siyudad sa Talisay ang ilang tabangan, hinungdan nga usa sa ilang rekisitos sa mokuha sa financial assistance mao ang barangay clearance.
Kahinunduman nga niadtong Biyernes sa buntag, Agusto 2, kapin sa 20 ka mga trabahante sa President Food ug Citifood ang nidangop sa CSWS aron magpatabang. (FMD)