NAGTUNGHA pa lang sa elementarya nakat-on na siyang manikaysikay aron masudlan ang nagkutoy niyang tiyan ug aduna’y ikasuporta sa iyang pag-eskuwela.
Si Alfie Pitogo, 45, ang kinamanghuran sa unom ka managsuon apan siya ra ang bugtong nakahuman sa pagtuon tungod sa kawad-on sa ilang pamilya.
Literal siyang nakat-ong mosakay sa sayaw sa sonata sa kinabuhi aron lang mabuhi niadtong panahon nga nag-ilaid sila sa kalisdanan.
Pagtungtong niya sa high school, nag-conductor ug nanghugas siya og mga sakyanan sa buntag. Apan sa gabii ballroom ug dance instructor siya sa mga private ug corporate shows.
Gikan sa boogie, chacha ug tango hangtod sa all-time dance hits nga “Brother Louie” (Modern Talking) ug Rico Mambo (Breakfast Club), kini ni Alfie pa, ang nahug nga soundtrack sa iyang kinabuhi. Dinhi nabaid ang iyang talento sa pagsayaw isip sakup sa Dance Sport.
Apan pag-gradwar niya sa high school wa dayon siya mokuha og 4-year course kay mas gipili niyang magtigum lang una.
Ni-eskwela siya og two years automotive mechanic sa Concord Technical Institute ug nitrabaho sa usa ka Japanese firm sa Mepza isip tourist guide sud sa upat katuig.
Apan naanghelan si Alfie kay gihatagan siya og scholarship sa University of the Visayas diin nigradwar siya sa kursong Bachelor og Secondary Education major in General Science (specializing in Biology) ug gipasidunggan pa og duha ka leadership awards sa Supreme Student Council niadtong 2002.
Tungod sa maayo niyang record gikuha dayon siya nga Science teacher sa UV diin sud sa 17 katuig na siyang nag-alagad karon.
Kasamtangan usab siyang konsehal sa barangay Cansaga, Consolacion sud na sa 30 katuig ug general manager sa nag-viral nga Paradise Hills Mountain Resort sa Buluang Compostela ug usa sa mga 2019 top agents sa Amalia Property Ventures Corp.
Alfie Pitogo, Ssssuper Ka!
Duna pa ka’y time matulog sa imong ka-busy?
Time management lang. Average sleeping time nako 5 to 6 hours. Akong klase sa UV kay 7:10 a.m. up to 4 p.m. After that mosirit nako sa Paradise Hills Mountain Resort. Abot ko didto mga 6 p.m. basta weekdays. Pero kon weekend ug holidays tua jud ko didto full-time sa resort. Kon dunay clients sa real estate modagan na sad ko. Sa barangay, every Monday mi mag-session usually gabii man so makatambong ra gihapon ko. Ang free time nako sa pamilya na. Usa ra man akong anak, lalaki, 10 years old. Akong wife nag-work as pharmacist.
Asa imong parents?
Akong mama namatay na college pa ko. Akong papa tua sa Davao duna na say iyang kinabuhi. Sa una dili man sila motuo’g edukasyon gud. Mao karon tabang ko nila.
Unsay tambag nimo sa mga kabus nga kabataan nga duna say mga pangandoy?
“Poverty is not a hindrance to your success.” Wa gyud na nako wagtanga nga motto bisan asa ko. Sakripisyo lang, antos lang gyud. Then huwata ang time nga imo na. Ayaw pagdali. Kay kon para imo na para imo gyud na. Labaw sa tanan always ask for guidance sa Ginoo.
Unsa pa’y gusto nimong makab-ot?
Ganahan ko mohimo og foundation para sa mga out-of-school youth. Actually, nakapa-eskwela na kog 25 kabuok. Ako silang gitabangan aron makasud as working student sa UV. Ako kuntento na man ko sa akong kinabuhi. Duna ko’y mga residential properties ug mga rent-a-car pero wa ko mangambisyon ma-milyonaryo ko. Mahatagan lang nakog maayong kinabuhi akong pamilya ug magpuyo mi nga malipayon mao ra gyud na. Life is short. Di na nato mada. Haha...