WALO ka mga batan-ong karatesta nga nagagikan sa Sugbo ang mosalmot sa unang Shureido Cup Karate Championships nga ipahigayon sa Kota Kinabalu, Malaysia karong Agusto 14 ngadto sa 18, 2019.
Ang mga sakop sa Sports Karatedo Organization (SKO) - Pilipinas nga nagbasehan sa Subangdaku, Mandaue City mao ang mo-represent sa Cebu sa maong international event nga giorganisar sa Sabah Karate Association sa Malaysia.
Si Jess Paredes, SKO-Pilipinas chief instructor ug coach, miingon nga ang team pangulohan ni Janine Norboada, kinsa nakaangkon na og mga medalya sa mga torneyo.
Si Narboada nahimong gold medalist sa kata (forms) ug kumite (sparring) events lakip na ang bag-o lang natapos nga Pilipinas 2019 national championships sa Pasig City sa niaging Mayo 3-5.
Ikauban ni Narboada sa Malaysia mao sila si Cyril ug John Rans Mahinay; Alex Carmille Patalinghug, Alexis Nicole Villacarlos, Christine Marie Sacedon, Jhudiel Olivar ug Tresha Jean Ogoc. Kini maoy unang higayon nga ang walo ka karatekas mosalmot gawas sa nasod. (JKV, JBM)