UC-USPF; USJ-R batok CIT-U karong gabii sa Inayawan

UPAT ka mga teams sa Cebu Schools Athletics Foundation, Inc. (Cesafi) ang mopakita og aksyon sa dihang sugdan na karong gabii ang 1st Barangay Captain Kirk Brian Repollo Inter-collegiate tournament diha sa Inayawan Sports Complex, dakbayan sa Sugbo.

Kini mao ang University of Cebu (UC) Webmasters, University of Southern Philippines Foundation (USPF) Panthers, University of San Jose Recoletos (USJ-R) Jaguars ug Cebu Institute of Technology-University (CIT-U) Wildcats.

Karong gabii, ikasangka sa Webmasters ang Panthers sa opening game nga sugdan sa alas 7:30 sa gabii samtang ang magtigi usab sa main game ang Jaguars ug Wildcats.

Ang torneyo nga giisip nga usa sa mga kalihukan sa naghinangat nga kapistahan sa maong barangay mosubay sa single round-robin series diin ang top two teams maoy magtakos alang sa championship samtang ang no. 3 ug no. 4 teams ang mag-ilog sa third place honor.

Ang kampyon sa usa ka semanang kompetisyon makadawat og P25,000 ug championship trophy samtang P20,000 ang maangkon sa runners-up.

Makabulsa usab og P15,000 ug P10,000 ang maangkon sa ikatulo ug ikaupat nga luna.

Si Edwin Dejacto maoy magsilbing commissioner sa maong tournament. (JBM)