MGA beterano ug dekalidad nga mga players sa National Basketball Association (NBA) nga sila si Patty Mills, Aron Baynes, Matthew Dellanova ug Joe Ingles ang nalakip sa team sa Australia alang sa FIBA World Cup nga sugdan sunod buwan sa China.
Laing tulo ka mga players ang sa unang higayon mopakita og aksyon sa international competiton ang anaa usab sa team.
Kini mao sila si Jonah Bolden sa Philadelphia Sixers ug Xavier Cooks kinsa nakaduwa sa Germany ubos sa Oliver Wurzburg team sa wala pa moduwa sa NBA Summer League sa Phoenix Suns ug Jock Landale nga nakaduwa sa Zalgiris Kaunas sa Lituania ug sa Milwaukee Bucks sa NBA Summer League.
Mahibalik usab sa team si Andrew Bogut ug Chris Goulding kinsa nakaduwa nauban nila ni Mills, Baynes, Dellavedova ug Ingles sa 2016 Olympics sa Rio de Janerio diin sila napildi og usa ka puntos lang sa Spain alang sa bronze medal match.
Hinuon sila si Ben Simmons sa Sixers ug Thom Maker sa Detroit Pistons ang nakadesider nga dili lang una moduwa sa Australia aron pangandaman sa sunod season sa NBA.
Dili usab moduwa sa Australia sila si Dante Exum sa Utah Jazz (knee surgery) ug Ryan Broekhoff sa Dallas Mavericks.
Ang Boomers nahitapo sa Group H sa World Cup. Una nilang makontra ang Canada sa Sept. 1, Senegal sa Sept. 3 ug Lithuania sa Sept. 5. (JBM)