ANG usa sa giilang Mexican warrior nga si Carlos Cuadros mao karon ang giumol ni Bob Arum nga mosuway og langkat sa titulo ni International Boxing Federation (IBF) super-flyweight Jerwin Ancajas. Kini gikatakda karong Oktubre.
Matod pa ni Arum nga si Cuadras, kanhi World Boxing Council champion, maoy iyang ipakontra ni Ancajas, kinsa lab-as pa sa iyang 7th round knockout nga kadaugan batok sa challenger nga si Ryuichi Funai sa Stockton, California.
Hinuon wa pa matino kon asa ipahigayon ang away. Tungod niini, ang training camp ni Ancajas nga gipangulohan ni Joven Jimenez milarga gilayon paiingon sa Philippine Marines Naval Station sa San Antonio, Zambales alang sa subsob nga ensayo sa dili pa kini mopaingon sa Estados Unidos.
Apan si Sean Gibbons, ang pangabaga ni Manny Pacquiao ug mao usab ang official representative ni Ancajas, mibutyag nga wala pay kasabutan nga natigayon.
Gipasabot ni Gibbons nga wa pay kontrata nga gipresentar sa matag habig. Bisan pa niini, si Gibbos nagtuo nga mahinayon ang maong panagsangka ilabi na kay nagpanikad na ang 27 anyos nga Ancajas nga makasaka og balik sa ring.
Ang 30-anyos nga Cuadras, tuohon, adunay impresibong record nga 38-1-2, 21 KOs. Tulo ka mga Pinoy fighters nga sila si Fernando Lumacad, Marvin Mabait ug Ritchie Mepranum ang iya nang gipangbiktima.
Samtang ang walhon nga Ancajas, sa iyang bahin, naghambin og 31-1-2, 21 KOs nga baraha.
Nagtuo si Arum nga ang Ancajas-Cuadras fight makaagni og mga boxing aficionados ug makakabig usab sa intres sa ESPN nga maoy mopasalida sa maong away. (JBM)