INTERESTING ang atong sulat-suliran karong semanaha. Naghisgot kinig kumon nga kasinatian nga way kaseguroan kon aduna ba gyoy nakasinati niini. Kumon tungod kay nakadungog na tang tanan ining mga butanga, apan way kaseguroan kay kutob man lang ni sa istorya. Apan importante siya kay kabahin na kini sa atong kultura, nakatatak na sa atong literatura ug imahinasyon.
Ania ang sulat:
Insoy, motuo kag manananggal? Naa man gud koy naibgan sa among silingan. Gwapa, sexy, pero ingon si mama’g papa ayaw kay manananggal kuno ilang pamilya. Tabangi ko noy kay lisoda pud og makauyab kog manananggal oy. Salamat. – Wesley of San Fernando, Cebu
Tubag:
Dili tinuod ang manananggal, dong Wesley. Ang manananggal usa ka vampire-like mythical creature sa Pilipinas, sa Luzon to be specific. Gikan man gani sa Tagalog word “tanggal” ang “manananggal.” Sa iningles, separator. Sa Bisaya pa, putol, o tigputol, kay maputol man lagi ning lawas sa manananggal kon padung na mo-duty. Kay mythical man, di tinuod, produkto lang sa imahinasyon, mabasa ra sa mga folk tales ug makita ra sa horror movies.
Nagtubo ta aning mga estoryaha, nakagamot na ni sa atong consciousness. Usahay motuo ta nga tinuod ni. Mora ba anang bakak nga kon balik-balikon murag tinuod na.
But for the sake of discussion, ibutang ta lang nga tinuod ang manananggal. Kon tinuod man gani ni, di malikayan nga ma-crush ka nila kay talented kaayo sila. Dili tanang babaye kamao moputol sa ilang lawas unya ibalik ra pud inig human nga mura lag way nahitabo. Magic. Way tahi-tahi, way duct tape, way Elmer’s Glue, automatic nga magtapot og balik ang duha ka parte sa lawas. Talagsaon ni nga abilidad.
Conscious pud kaayo ang manananggal sa iyang expenses, a very attractive trait in a girl. Mag-blouse ug sayal siya pirmi kay kon mag-dress siya, gasto kaayo kay magisi man nig apil inig kaputol sa iyang lawas, magsige siyag palit og bag-o. Kon blouse ug sayal ra, way magisi inig kaputol sa lawas may hawak dapit.
Ma-in love pud ka sa mga manananggal kay super sensitive sila sa needs sa ilang partner. Kay gabii man sila mo-duty, mag-unsa na man lang intawon ang ilang pares kon bation kinig kainit sa lawas? Labing sakita tingali nang maputol ang lawas, apan buhaton ni sa manananggal tungod ug alang sa iyang partner. Ang pagputol sa iyang lawas maoy ultimate sacrifice sa manananggal in the name of love.
MANANANGGAL 1: Honey, mo-duty. Pero ayaw kaguol, ibilin ko ning ubos nga bahin sa akong lawas aron naa gihapon kay kalingawan.
MANANANGGAL 2: Okay honey, pwede na ni.
Mao nga ayaw kaguol, dong Wesley, kon manananggal man gani nang imong naibgan. Grabe mosakripisyo ang manananggal alang nimo nga iyang gihigugma.