SUPERBALITA CEBU

Barrita: Civil partnership

Tipik sa Balaod

DUNAY nag-ung-ong nga mga balaudnon sa Kongreso nga nagproponer sa same-sex marriage. Gipalapdan pa kini aron maglakip niadtong di mahimong magminyo ug niadtong mahimong magminyo apan di gustong magmingyo, kay kon maminyo na, lisod kaayong libkason.

Gipasaka ni kanhi House Speaker ug karon Davao del Norte 1st District Rep. Pantaleon Alvarez sa 18th Congress ang House Bill 2264 nga magtugot sa magtiayon sa pagsud sa usa ka civil partnership. Ang mosud niini mahimong babaye sa lalake, lalake sa lalake ug babaye sa babaye.

Ubos sa House Bill 2264, ang tanang benepisyo ug proteksyon nga gihatag ngadto sa magtiayon nga kasado ubos sa mga balaod, administrative orders, court rulings, ingon man niadtong gitumong alang sa public policy ihatag usab ngadto sa mga civil partnership couples.

Sa samang higayon, ang mga civil partnership couples makapahimus usab sa tanang balaod sa marital relations, lakip sa donasyon tungod sa kaminyuon, legal separation, adoption, child custody ug support, property division ug maintenance ug spousal support.

Gibasihan ni Alvarez niini mao ang katungod sa tanang mga Pilipino sa “equal protection under the law and to freely associate themselves with others.” Sanglit ubos sa balaod di man mahimong magminyo ang parehong babaye ug parehong lalake, ang gidangpan mao ang civil partnership.

Ang samang balaudnon gipasaka ni Alvarez sa 17th Congress, apan wa kini mapasar bisan sa committee level. Tungod tingali kini sa nipatigbabaw nga sentimiento sa publiko nga supak sa same-sex marriage.

Sa usa ka face-to-face interview survey nga gihimo sa Social Weather Stations (SWS) niadtong Marso 23-27, 2018, 61 porsento sa 1,200 ka mga respondents sa tibuok nasod niingon nga supak sila sa balaudnon nga maghimong legal sa “civil union of two men or two women.”

Sa samang survey, 44 porsento niingon nga hugot ang ilang pagsupak niini, 17 porsento morag nisupak, 22 porsento lang ang nipaluyo ug 16 porsento ang wa pay desisyon. Wa pay bag-ong survey nga nagpakita nga gipaluyohan ang maong balaudnon ni Alvarez.

Si Atty. Clara Rita Padilla, executive director sa EnGendeRights Inc., usa ka human rights organization nga nakigbisog batok sa discrimination sa kababyen-an ug sa LGBTQI (Lesbian, Gay, Bisexual, Transgender, Queer or Questioning, and Intersex), niingon nga ang balaod sa Pilipinas kinahanglang magtamod sa tawhanong katungod sa tanan nga di magpinig sa ilang sexual orientation, gender identity and expression (SOGIE).

Tugotan ang tanan sa pagminyo? Hinumdumi lang nga ang kaminyuon mao ang numero unong hinungdan sa panagbuwag. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph