GIABLIHAN na sa Land Transportation Office (LTO) 7 ang Bantayan Island Extension Office para maoy moatiman sa panginahanglan sa tulo ka mga lungsod nga nahisakop sa isla.
Si Regional Director Vic Caindec nipahibawo nga mapahimuslan sa libuan ka mga lumolupyo sa tulo ka mga local government unit nga gilangkuban sa Bantayan Island, Madridejos ug Sta. Fe.
Lakip sa gitanyag sa Bantayan Island Extension Office (BIEO) mao pag-isyu sa student permit, renewal sa driver’s license ug renewal sa motor vehicle registration ug ubang MV registration transactions.
Ang pangulo sa LTO 7 nagkanayon nga nahatagan na og katumanan ang damgo sa taga isla nga mapaduol ang serbisyo sa LTO aron di na sila motabok sa mainland Cebu para sa renewal sa ilang mga lisensya ug pagrehistro sa ilang mga sakyanan.
Si Caindec nagpasalamat kang Secretary Michael Dino sa Office of the Presidential Assistant for the Visayas (OPAV) ug sa LGU sa Sta. Fe kinsa maoy iyang katambayayong para sa katumanan sa proyekto.
Ang BIEO maoy ikaduha nga giablihan ni Caindec human sa Lapu-Lapu Island Central Mall.
Karong Biyernes, Agusto 9, 2019, ablihan na usab nila ang Camotes Island Extension Office.
Kini moserbisyo sa panginahanglan sa mga lumolupyo sa mga lungsod sa Poro, Pilar, Tudela ug San Francisco.
Ang iyang mahatag nga serbisyo sama sa Bantayan Island.
Ikaupat nga ablihan sa LTO 7 ubos sa liderato ni Caindec mao ang sa Alturaz Mall sunod semana.
Moisyu kini og student permit, driver’s license apan way MV registration.
Ang ikalima mao ang Balamban Extension Office karong Agusto, kansang serbisyo pareha sa Camotes ug Bantayan island. (PAC)