NAVAL, Biliran -- Naluwas sa mga awtoridad ang pipila ka mga bata nga biktima sa cyber pornography ning lungsod niadtong Martes, Agusto 6, 2019.
Ang suspek mag live in partner, apan subject sa operasyon mao ang babaye nga gitago sa pangan nga si Sheena, 18.
Aang mga sakop sa Women and Children Protection Center - Visayas Field Office nakadawat og impormasyon bahin sa kadudahang online activity.
Sa imbestigasyon ug pagpaniid sa mga awtoridad, nasuta nga ilegal ang gihimo sa mag live in partner.
Alas 11 sa buntag sa maong adlaw, gilusad sa WCPC ug Biliran Police Provincial Office uban sa mga social workers ug non-government organization nga International Justice Mission (IJM) ang usa ka operasyon sa usa ka hotel nga giabangan sa mga suspek.
Naluwas sa mga awtoridad ang siyam ka mga bata lakip niini ang duha ka mga anak sa mga suspek.
Ang mga biktima naglangkob sa duha ka mga lalake nga nag edad og 14; 15 anyos nga batang babaye; laing tulo ka lalake nga nag edad og 17 ug usa ka 20 anyos nga naluwas sa laing dapit.
Ang duha ka mga anak sa mga suspek susihon usab kon apil ba kini sa mga nabiktima sa online trafficking.
“OSEC perpetrators think that they can evade the law. But they are completely mistaken,” matod sa hepe sa WCPC, Romeo Perigo.
Naa na karon sa kustodiya sa kapulisan ang mga dinakpan ug giandam na ang mga ebidensya sa pagpasaka og mga kaso.
Samtang ang naluwas nga mga bata naa sa kustodiya sa Department of Social Welfare and Development (DSWD).
Giawhag usab sa mga awtoridad ang publiko sa pag-report niadtong mga tawo nga nibuhat sa samang krimen.
Gisiguro sa mga awtoridad nga pahamtangan igong silot ang mga suspek sa online child trafficking.