SIYENTO porsyento nang andam ang Lapu-Lapu Police Office (LCPO) alang sa Ironman 70.3 karong Dominggo, Agusto 11.
Kini maoy gipahibalo sa hepe sa LCPO Police Colonel Clarito Baja sa mga tigbalita.
Matod niya nga mopakatap na sila ug kapulisan sa siyudad karong adlawa. Huwebes, Agusto 8, hangtod na sa adlaw sa lumba sa triathletes.
Sobra sa 500 ka mga pulis e ang ipakatap sa syudad ug mahimo silang marshal ug road security personnel.
Hinuon, matod ni Baja nga walay angay nga kabalak-an ang mga musalmot sa maong kalihukan tungod kay duna usay dugang marshals nga ipakatap gikan sa Sunrise events, Philippine Air force, reservists, ug force multiplier gikan sa mga barangay.
Apan bisan paman sa kaandam sa kapulisan, mipahimangno si Baja sa mga supporters sa mga athlete ilabi na sa mga sikat nga personalidad nga musalmot sa maong kalihukan nga hinay-hinay lang aron malikay sa disgrasya.
“Di man nato kalikayan nga naay ilado gyud na experience namo sauna nga mudumog sa karsada so ako lang gihangyo ang mga katawhan kun makita kaway nalang dili ta mudasdas kay delikado ang disgrasya,” matod ni Baja.
Pahibaw usab niya sa mga Oponganon nga itug-an sa kapulisan kon duna ba’y mga kadudahan o mga insidente sa lugar kay matod niya musiaw pod unya ang mga criminal ug illegal nga kalihukan samtang busy ang kapulisan sa Ironman. (ANV)