Delos Reyes: Mosugal ka ba sa Dengvaxia?

DAW multo nga gikahadlokan sa katawhan labi na sa mga nabakunahan ang Dengvaxia vaccine nga pang-alkontra kuno sa dengue kay inay ang kagaw maoy patyon, apan ubay-ubay sa gibakubahan sa administrasyon ni kanhi Presidènt Benigno Aquino III ug Department of Health (DOH) Secretary Janette Garin ang nangatigbak.

Sa mga autopsy nga gibuhat sa Public Assistance Office, ang mga nabakunahan nga nangamatay magkapareha ang ilang gidangatan ug hinungdan sa ilang kamatayon.

Nakita ang internal bleeding sa kasing-kasing, baga ug sa utok sa mga estudyante nga naghandum nga haw-ason sa kalisud ang ilang pamilya ug mipanaw bilin ang kasakit ug kapait sa mga ginikanan tungod sa nahanaw nga pangandoy.

Dunay 729,105 ka mga ginikanan ang mihatag sa ilang pagtugot nga bakunahan sa Dengvaxia ang ilang mga anak kontra sa Dengue sa mga pinili nga eskwelahan, apan 491,990 lang ang nahatagan sa unang bakuna diin 3,281 ang nadala sa mga tambalanan sugod Marso 2016 hangtud Marso 2018.

Duna nay 142 ang gikadudahan nga namatay tungod sa Dengvaxia vaccine ang na rekord hangtud Hulyo 4, 2019, gilangkuban sa 139 ka mga bata ug 3 ang hamtong.

Gibasul sa mga ginikanan ug katawhan si Pinoy ug DOH Chief Janette Garin ug gipaatubang sa hearing sa Senado kalabot sa Dengvaxia.

Sa milabay nga midterm elections, mibalik pagdagan si Garin ug karon representante o congresswoman sa 1st District, probinsya sa Iloilo.

Gisugyot karon ni Garin nga ibalik ang Dengvaxia tungod sa nagkadaghang kaso sa Dengue sa atong nasud apil na sa atong dakbayan sa Davao ug sa kinatibuk-ang Davao region.

Ang DOH mideklara og National Dengue Alert niadtong Hulyo 4, 2019 tungod 500 ka tawo na ang namatay tungod sa kagaw nga dala sa lamok nailhan nga Dengue.

Kon morekomenda ang DOH nga gamiton pagbalik ang Dengvaxia vaccine ubos sa pagdumala ni Health Secretary Francisco Duque mahimo kining dakong sagpa sa administrasyon ni President Rodrigo Duterte tungod sa pagbatikus sa kanhing administrasyon kay daghang kabataan ang namatay sa gipatuman sa Dengvaxia vaccination ubos sa administrasyon ni PNoy ug Garin.

Kon ikaw usa ka ginikanan, mosugot ka ba nga turokan og Dengvaxia vaccine ang imong anak aron maluwas sa makamatay nga dengue?

Daw bebingka ang kahimtang sa gobyerno ugaling mosugal pagbalik sa Dengvaxia vaccine samtang ikalipay og dako sa mga gibatikos ug giakusahan nga nakasapi sa pagpatuman sa Dengvaxia vaccination.

Alang nimo, mosugal ka ba sa Dengvaxia?