WALAY kalabutan sa mga investment schemes ang natigayong mga sunod-sunod nga pagpamatay sa Tagum City.
Kini ang gibutyag ni Police Major Jason Baria, tigpamaba sa Police Regional Office (PRO) Davao Region atol sa AFP-PNP Press Conference sa The Royal Mandaya Hotel, Miyerkules, Agosto 7.
Sumala ni Baria nga walay kalabutan sa mga money investment schemes ang pagpamatay sa dakbayan sa Tagum.
Gitin-aw ni Baria nga subay sa gilusad nga imbestigasyon sa sa Tagum City PNP, migula nga pulos dunay atraso sa mga kaila nga mabutang ngadto sa “personal grudges” ang motibo.
“Walang kinalaman sa mga money investment schemes ang nangyayaring mga shooting incidents sa Tagum kamakailan, kun di mga personal grudges ito,” tipik sa giingon ni Baria.
Una niini, migula sa social media, gipagawas sa mga netizens nga dunay mga atraso sa mga money investors ang mga gipamatay.
Nakita sa netizens nga walay semana kung walay gipamusil sa Tagum City.
Una kining mikatag nga impormasyon dihang gipusil patay ang usa ka empleyado sa Ever Arm Any Marketing, usa ka money investment sa Tagum City diin sa pagkakaron nanirado na ug gidagan ang dakong kantidad sa salapi sa mga investors.
Apan gitin-aw ni Baria nga dili ihulog nga dunay kalambigitan sa investment schemes ang mga biktima sa pagpamusil sa Tagum sanglit makapaubos sab sa dignidad sa mga nahibilin nga pamilya.
Ang imbestigasyon sa kapulisan ang labing tinuod unsay kinatibuk-ang anggulo sa hitabo kung mahuman na ang pagpalawom sa imbestigasyon sa usa ka krimen. (Jeepy P. Compio)