PAGPAMINTAL sa tulo ka andana nga Tayemco Building nga nahimutang sa Maximo Patalinjug avenue, Barangay Pajo, Lapu-Lapu City gihunong human nakadawat sa work stoppage order (WSO) nga giluwatan sa Department of Labor and Employment (DOLE).
Kini human nasuta sa ahensiya nga daghang mga kalapasan ug kakuwangan ang management ug JRDM Builders, kontraktor sa pagtrabaho sa proyekto diin duha ka gi-hire nga mga pintor nakuryentihan niadtong miaging semana, usa namatay.
Naabtan sa SunStar / Superbalita Cebu ang tulo ka mga trabahante sa JRDM Builders nga nanglimpyo sa gawas sa establisemento sama sa pagtrapo sa abog ug pagpanilhig.
Opisyal sa JRDM Builders kinsa nagdumili sa paghatag sa iyang ngalan igo lang miingon nga gipahunong sila sa trabaho samtang nagkompleto pa sila gipangayong requirement gikan sa Dole.
Apan ang mga metal scaffolding pabilin pang nagbarog nga nalakip sa cease and desist order sa Dole.
Si Dole Regional Director Salome Siaton nipagawas og WSO niadtong Sabado, Agosto 3 batok sa management sa Tayemco Building lakip na ngadto sa JRDM Builders.
Nasuta sa ilang labor inspection ang project site nga pakyas ang management sa pagpakita sa ilang Dole-approved Construction Safety and Health Program.
Nahibaw-an sab nga way certified scaffold erector nga adunay NC II nga gikan sa Technical Education and Skills Development Authority (TESDA) ang gipabarog nga scaffolding.
Wa usab silay safety officer on duty atol sa insidente, way gitaod nga wire insulator sa electric power lines ug way Hazard Identification Risk Assessment and Control atol sa pagtabaho.
“The issuance of said WSO ordered management of Tayemco Building and JRDM Builders to cease and desist from all its scaffold erection and painting works within the project site until such time that violations noted under the Occupational Safety and Health Standards have been rectified,” si Salome nagkanayon.
Sila si Jessie Onong, 32, ug Jerwin Lupar, 30, pulos taga-Davao City nakuryentihan samtang namintal niadtong Agosto 2 human nasabod sa high tension wire sa Mactan Electric Company .
Gidali sa pagdala sa pribadong tambalanan sa Lapu-Lapu City ang mga nabiktima, apan si Lupar nakabsan sa kinabuhi.
Ang management mag-atubang usab og lain tulobagon base sa nakita nga kalapasan sa labor inspector. (FVQ, HBL)