ANG contractor sa Vista-Suarez Cebu condominium gitugotan sa Office of the Building Official nga makasulod sa Juanita building aron masusi ang structural stability human sa pagkahugno sa parte sa edepisyo gumikan sa pagkahugno sa ilang protection slope.
Gipahibawo ni Florante Catalan, pangulo sa OBO, nga nibisita sa iyang buhatan ang mga representante sa IPM Construction and Development Corporation, Vista Residences Inc. ug Corrtech Inc. para ipahibawo ang ilang sunod nga lakang sa ilang mitigating measures. “Ako silang giingnan nga wala mo gipahunong sa Cebu City Government on the mitigation part (on the collapse area) apan gipahunong mo for the further excavation and the civil works,” asoy ni Catalan sa ilang estorya uban sa contractor.
Matod pa sa OBO chief nga unang buhaton sa contractor mao ang pagsusi sa Juanita building kon luwas pa ba kini nga okupahan sa mga tenant o dili na.
Ilang isunod ang paghawan sa mga tipaka sa pagkahugno sa di pa isunod ang pagpalig-on sa pundasyon.
Gimanduan sa pangulo sa OBO ang contractor sa paghimo gilayon sa ilang sunod nga buhaton aron mapahibawo ngadto sa mga okupante sa Juanita building aron makahimo na usab sila sa sunod nilang lakang pagpadayon sa ilang negusyo.
Ang City Government niisyu og cease and desist order sa pagkubkob sa pundasyon sa Vista-Suarez Cebu Condo nga adunay 26 ka andanang gitas-on ug construction sa 18-storey High Point building nga nahimutang sa iyang tupad.
Apan nahibaw-an sa Superbalita Cebu nga boluntaryong nihunong sa ilang trabaho ang High Point pipila na ka buwan ang nakalabay sanglit apektado ang ilang trabaho gumikan sa pagliki sa slope protection sa Vista-Suarez nga naa sa tungod sa ilang construction.