PATAY ang usa sa gitumbok nga suspetsado sa pagpanglugos sa usa ka dalaga mga alas 2 sa hapon sa Barangay Poblacion, Valencia City, Bukidnon.
Si Police Lieutenant Colonel Surki Sereñas, hepe sa Valencia City Police Station, miila sa suspek nga si Julieto E. Inocencio, alyas “Lalang”, ug notoryus nga nalambigit sa pagpayuhot sa ginadili nga druga ug pagpangawat, ug adunay pending nga kasong pagpanglugos.
Matud ni Sereñas sa SunStar Superbalita, ang suspek ila na nga gi-monitor ang lihok.
Mga alas 2 sa hapon, Agusto 6, nabantayan ang kadudahang lihok niini sa may Diversion Road nga bahin sa maong barangay.
Mikasa ug operasyon ang elemento sa Valencia City Police Station, lakip ang Provincial Drug Enforcement Unit (PDEU) ug 1003rd, ug nagpakita sa pagsukol ang suspek hinungdan nga napusilan.
Narekober sa crime scene ang kalibre .38, tulo ka rounds sa buhing bala sa .38 kalibre, ug 20 ka pakete sa gitouhang shabu.
Nadala pa ang suspek sa tambalanan apan dead on arrival kining gideklarar sa mga doktor.
Gikumpirmar sab ni Sereñas nga notado ang suspek sa nagkalain-laing kriminalidad ug adunay pending nga kaso sa pagpanglugos.
Gilantaw niini nga posibleng gisugo ang suspek sa pagpatay ug paglugos sa saleslady, ug kini ang ilang giimbestigahan karong panahona tungod kay adunay mga koneksyon sa ilang nagpadayon nga imbestigasyon.